Վերջին օրերին բուռն քննարկումների առիթ էր տվել ՀՀ իշխանությունից 3 առանցքային պաշտոնյայի՝ փոխվարչապետ Տիգրան Ավինյանի, ԱԳ նախարար Զոհրաբ Մնացականյանի և ԱԺ նախագահ Արարատ Միրզոյանի  ԱՄՆ մեկնելու փաստը։ Հատկապես հետաքրքիր էր, թե երկրում տիրող սոցիալական անապահովության ֆոնին որքան գումար է ծախսվել բյուջեից շուրջ 10 և ավելի օրեր ԱՄՆ-ում գտնվող իշխանական պատվիրակությունների համար և այդ ինչ կարևոր հարցեր էին լուծում, որ չէին կարող սահմանափակվել ասենք՝ 3-4 օրով, որպեսզի հնարավորինս խուսափեին նաև ավելորդ գումարների վատնումից։

 

Փոխվարչապետ Տիգրան Ավինյանի գրասենյակից մեր հարցմանն ի պատասխան հայտնեցին, որ հուլիսի 13-22-ը փոխվարչապետի հետ միասին ԱՄՆ գործուղման են մեկնել փոխվարչապետի գրասենյակի ղեկավար Սերժ Վարագ Սիսեռյանը և խորհրդական Զարուհի Մաթևոսյանը։ Գործուղման ծախսերը կազմել են 7037100 ՀՀ դրամ։ Յուրաքանչյուր անձի գործուղման ծախսը կազմել է 2345700 ՀՀ դրամ, այդ թվում՝ էկոնոմ դասի ավիատոմսեր (Երևան-Մոսկվա-Նյու Յորք-ԲոստոնՆյու Յորք-Մոսկվա-Երևան)՝ 728670ՀՀ դրամ, օրապահիկ (6 օր Նյու Յորք, 4 օր Բոստոն)՝ 523746 ՀՀ դրամ, գիշերավարձ (5 գիշեր Նյու Յորք, 4 գիշեր Բոստոն)՝ 1093284 ՀՀ դրամ։

 

Նշենք, որ Ավինյանն ԱՄՆ-ում մասնակցել է «Կայուն զարգացման բարձր մակարդակի քաղաքական ֆորում 2019»-ին։ 

 

Արտգործնախարարությունից ևս հետաքրքրվեցինք, թե քանի անձ էր ընդգրկված Զոհրաբ Մնացականյանի ԱՄՆ կատարած այցի պատվիրակության կազմում, և ովքեր էին նրանք։ Մեզ հետ զրույցում Արտգործնախարարության մամուլի խոսնակ Աննա Նաղդալյանընշեց, որ ԱԳ նախարարին ուղեկցել է 4 աշխատակից, որից մեկը ինքն է, խորհրդականը, արարողակարգի պատասխանատուն և օպերատորը։ Ինչ վերաբերում է ծախսերին, ապա մամուլի խոսնակը նշեց, որ համաձայն ՀՀ ԱԳ նախարարի 16 հունիսի 2017 թվականի Հր. 1002-Ն հրամանի՝ արտասահմանյան գործուղումների ծախսերը ենթակա չեն հրապարակման․ «ԱԳՆ համակարգի աշխատակիցների գործուղումների համար տարվա ընթացքում պետբյուջեից առանձին հատկացումներ չեն արվում, և ծախսերը չեն որոշվում ըստ գործուղումների քանակի, քանի որ դրանք կատարվում են արդեն իսկ տվյալ տարվա համար պետբյուջեով ԱԳՆ պահպանման ծախսերում գործուղումների համար նախատեսված միջոցների հաշվին և սահմաններում։ Միաժամանակ հավելենք, որ համաձայն ՀՀ ԱԳ նախարարի 16 հունիսի 2017 թվականի Հր. 1002-Ն հրամանի՝ արտասահմանյան գործուղումների ծախսերը ենթակա չեն հրապարակման»,- ասաց նա։

 

Նկատենք, որ Մնացականյանն ԱՄՆ այցի ժամանակ հանդիպում ունեցավ միայն ԱՄՆ պետքարտուղարի Եվրոպական և Եվրասիական հարցերով տեղակալի պաշտոնակատար Ֆիլ Ռիքերի հետ: Ի դեպ, միջոցառմանը մասնակցում էր նաև պետքարտուղար Մայք Պոմպեոն, ում հետ այդպես էլ հանդիպում չունեցավ ԱԳ նախարարը, այն դեպքում, երբ դեռևս տարեսկզբից խոսվում էր Պոմպեո-Մնացականյան հանդիպման կազմակերպման մտադրության մասին։ Համենայնդեպս Պոմպեո-Մնացականյան հանդիպման մասին ԱԳՆ պաշտոնական կայքը հաղորդագրություն չի տարածել։