Պարետատունը քննարկել է Հայաստանում համաճարակային իրավիճակը և եկել այն եզրակացության, որ չկա այլընտրանք և առաջիկայում պետք է գնալ հակահամաճարակային կանոնների խստացման։ Այս մասին պարետատան նիստից հետո կայացած ճեպազրույցում ասաց ՀՀ վարչապետ Նիկոլ Փաշինյանը։
«Քանի դեռ թվերի փոփոխություն չունենք, քանի դեռ հակառակ դինամիկա չենք արձանագրել, պետք է գնանք խստացման կանոններով, ընդ որում՝ այդ խստացումների փաթեթը կարող է ամենատարբեր ուղղությունները ունենալ»,- նշեց նա։
Փաշինյանի խոսքով՝ Հայաստանում հակահամաճարակային կանոնների խախտման դեպքերն սկսել են առավել ցայտուն արտահայտվել։
«Գիտեք, որ ունենք քրեական գործ հակահամաճարակային կանոնի խախտման դեպքի առթիվ, երբ դրական ախտորոշմամբ քաղաքացին տաքսի վարելով է զբաղվել, իրավապահներն արձանագրել են և քրգործ են հարուցել այդ փաստի կապակցությամբ»,- ասաց վարչապետը:
