Առողջապահության նախարար Արսեն Թորոսյանի շուրջ օղակը սեղմվում է: Սոցիալական ցանցերից նախարարի հեռանալուց հետո որոշ լրատվամիջոցներ շտապեցին եզրակացություններ անել, ասելով, որ սա Թորոսյանի՝ նախարարի պաշտոնից հրաժարականի առաջին ազդանշանն է: Տևական ժամանակ է, ինչ շրջանառվում են լուրեր, որ նա կթողնի իր պաշտոնն ինչպես կառավարության հակակոռուպցիոն քաղաքականության, որը սոցցանցերի օգտատերերի մի մասի կարծիքով ձախողվել է, այնպես էլ ոլորտում աղմկալի հրաժարականների պատճառով: Հրաժարականի մեկ այլ հավանական պատճառ էլ Կոռուպցիայի կանխարգելման հանձնաժողովի հարուցված վարույթն է Թորոսյանի դեմ՝ իրավիճակային շահերի բախման առերևույթ դեպքի հիմքով: Չնայած հայտարարվել է, որ վերջինս երկարատև արձակուրդից հետո կվերադառնա իր աշխատանքին, հանրության մեծամասնությունը օբյեկտիվ կասկածանքով է վերաբերվում այդ հայտարարությանը և գտնում, որ Թորոսյանի օրերը նախարարի պաշտոնում հաշված են: 

Տարբեր շրջանակներում արդեն իսկ քննարկվում են Արսեն Թորոսյանի հավանական փոխարինողների անունները: Նրանք երեքն են: Առաջին թեկնածուն ԵՊԲՀ դասախոս Դավիթ Մելիք-Նուբարյանն է, որի լոբբինգով զբաղվում են Նիկոլ Փաշինյանի կինը՝ Աննա Հակոբյանը, Մելիք Նուբարյանը մինչ Թորոսյանի նշանակումը Առողջապահության նախարարության բժշկական օգնության քաղաքականության վարչության պետն էր, ով նախարարի նշանակումից հետո հրաժարական տվեց: Թորոսյանը իր հերթին բավական ուշագրավ կերպով էր մեկնաբանել վարչության պետի հրաժարականը: «Որոշ մարդիկ, որ հայտարարեցին, որ գնում են առողջապահության նախարարությունից, գնացել են իրենց կամքով, օրինակ բուժօգնության վարչության պետ Դավիթ Մելիք-Նուբարյանը, որին ես խնդրել եմ չգնալ։ Նա պարզապես անձնական նկատառումներով, քանի որ մեկ ուրիշ անձ գնում էր, ինքը հավատարմության նկատառումներով որոշեց գնալ, այն դեպքում, որ ես արդեն չգիտեի ոնց խնդրել, որ նա չգնա, քանի որ պրոֆեսիոնալ է։ Բայց եթե նա համարում է, որ այդ հավատարմությունը մեկ այլ անձին, որը, իրոք, պետք է գնար, ավելի կարեւոր է, քան գործը, դա նրա ընտրությունն է», - ասել էր այն ժամանակ դեռ նորաթուխ նախարար Արսեն Թորոսյանը։ Մելիք-Նուբարյանը վերջին օրերին նկատելիորեն ակտիվացել է, համավարակի թեմայով տարբեր հարթակներով հարցազրույցներ տալով՝ հիմնականում չեզոք գնահատականներ տալով կորոնավիրուսի դեմ ԱՆ ծավալած պայքարին: 

Երկրորդ թեկնածուն հայտնի վիրաբույժ Արտավազդ Սահակյանի որդին՝ Արամ Սահակյանը, «Իմ քայլի» պատգամավոր Հակոբ Սիմիդյանի ընկերն է։ Նրանք համերկրացիներ են: Սահակյանն արդեն 7 տարի է՝ ղեկավարում է «Սուրբ Աստվածամայր» բժշկական կենտրոնի պլաստիկ վիրաբուժության և միկրովիրաբուժության բաժանմունքը: Բացի այդ՝ վիրաբուժական գործունեություն է ծավալում ԵՊԲՀ-ի Առաջին կլինիկական հիվանդանոցում: Վերջին շրջանում Սահակյանը նույնպես ակտիվացել է, սակայն, ի տարբերություն Մելիք-Նուբարյանի, շատ ավելի թիրախային է քննադատում Արսեն Թորոսյանի և ԱՆ գործելաոճը, մասնավորապես անիմաստ քայլ անվանելով մասնավոր ԲԿ-ի հանդեպ վերահսկողական լծակների փոխանցումը առողջապահության նախարարությանը: Սահակյանի հայրը, սակայն, Արտավազդ Սահակյանը, համավարակի տարածման առաջին իսկ օրերին ֆեյսբուքի իր էջում գրառում էր կատարել, որով ըստ էության, զորակցում էր կառավարությանը, կոչ անում կիրառել խստագույն միջոցառումներ՝ մարդկանց տեղաշարժը և շփումը բացառելու համար: Արտավազդ Սահակյանը 2017 թվականի Ազգային ժողովի ընտրություններում առաջադրվել էր պատգամավորի թեկնածու Տավուշի մարզն ընդգրկող թիվ 13 ընտրատարածքում՝ ՀՅԴ վարկանիշային ցուցակով։ 

Կա նաև Արսեն Թորոսյանին փոխարինող երրորդ հավանական թեկնածուն: Հայտնի օլիգարխ Սամվել Ալեքսանյանը այդ պաշտոնում տեսնում է Ասատուր Ասատրյանին` «Նատալի ֆարմի» երբեմնի եւ «Աստղիկ» հիվանդանոցի այժմյան տնօրենին, որը «համատեղությամբ» Ալեքսանյանի քրոջ ամուսինն է: Ալեքսանյանը կնոջ եղբոր համար այդ պաշտոնը փորձում էր կորզել նաև 2018-ին, երբ ի վերջո Նիկոլ Փաշինյանի ընտրությունը կանգ առավ Արսեն Թորոսյանի վրա: Սամվել Ալեքսանյանը բիզնես գործունեություն է ծավալում նաև դեղերի և հիվանդանոցային ծառայությունների շուկայում և ավելի քան շահագրգռված է այս բարձր պաշտոնում ունենալ յուրային մարդու: Ի դեպ, Թորոսյանի հեռանալու մասին խոսակցությունների ֆոնին լրատվամիջոցներին հայտնի են դարձել որոշ դրվագներ, որոնք առնչվում են մի քանի ԲԿ-ներից ստացված կորոնավիրուսի տվյալների կեղծման հետ: Դրվագներից մեկով թեման առնչվում է հատկապես երևանյան ԲԿ-ների վերակենդանացման բաժանմունքներին ու ԿՏ հետազոտությունների իբր ուռճացված թվերին: Ընդ որում, այս ամենի մեջ, ըստ մամուլի, թաթախվել են Սբ․ Գրիգոր Լուսավորիչ ԲԿ-ը, Նորքի ինֆեկցիոն կենտրոնը և ևս մեկ կենտրոն, բայց զարմանալիորեն իրեն հեռու է պահել խոշոր գործարար Սամվել Ալեքսանյանին պատկանող Աստղիկ ԲԿ-ն: Ուշագրավ է, որ Ալեքսանյանը չի մտել իշխանության ներկայացուցիչների հետ խաղի մեջ, թերևս նա զգալով Թորոսյանի մոտալուտ հեռանալը փորձել է այսպիսով մաքուր պահել ԱՆ նախարարի իր ապագա թեկնածուն: 

Արսեն Թորոսյանի արձակուրդին դեռ 17 օր կա և այդ ընթացքում կարող են ի հայտ գալ նրան փոխարինելուն հավակնող նոր թեկնածուներ, սակայն հաշվի առնելով, թե ովքեր են կանգնած վերը նշված երեք թեկնածուների թիկունքին և զբաղվում նրանց լոբբինգով, կարելի է վաստահորեն պնդել, որ եթե Թորոսյանին փոխարինելու հարցը միս ու արյուն ստանա, ապա ընտրությունը կանգ է առնելու հենց այս թեկնածուներից մեկի վրա…