Արցախի Հանրապետության Հադրութ քաղաքում հոկտեմբերի 10-ին ադրբեջանական զինված ուժերը չորս քաղաքացիական անձի են սպանել: «Արմենպրես»-ի փոխանցմամբ` այս մասին հոկտեմբերի 11-ին կայացած մամուլի ասուլիսին հայտնեց Արցախի մարդու իրավունքների պաշտպան Արտակ Բեգլարյանը:
«Երեկ հրադադարի պայմանավորվածությունից հետո դիվերսիոն ադրբեջանական խումբը ներթափանցել է Հադրութ, ըստ որոշ տվյալների` նաև վարձկան ահաբեկիչների մասնակցությամբ, այնտեղ ահաբեկել են բնակչությանը, վառել են որոշ տներ, նաև սպանել են որոշ քաղաքացիական անձանց,: Երեկվա դրությամբ մենք տեղեկություններ ունեինք երկու հոգու մասով՝ հաշմանդամություն ունեցող մեկ երիտասարդ և նրա մայրը, որոնց սպանել են գնդակահարելով: Քիչ առաջ մենք տեղեկություններ ստացանք նաև երկու լրացուցիչ քաղաքացիական անձանց մասով` Նվեր Գրիգորյան և Արտյոմ Միրզոյան, ովքեր նույնպես սպանվել են: Առաջին երկուս քաղաքացիական անձինք սպանվել են իրենց տանը, ինչը նշանակում է, որ ուղղակի ներխուժել են տուն և գնդակահարել»,- ասաց Բեգլարյանը:
Արցախի ՄԻՊ-ը հավելեց, որ հաշմանդամություն ունեցող երիտասարդը մի քանի տեղից գնդակահարված է եղել, նաև կրակել են նրա ափին, ինչը թույլ է տալիս եզրակացնել, որ նա կամ ափն առաջ է պարզել՝ փորձելով պաշտպանվել, կամ ցույց է տվել, որ անզեն է, իսկ ադրբեջանցիները կրակել են նրա ձեռքին:
«Եղել է ահաբեկչություն, պատերազմական հանցագործություն, և պետք է հանգամանքները պարզենք, հետամուտ լինենք, որ հանցագործներն իրենց պատիժները ստանան»,- նշեց Արտակ Բեգլարյանը:
Հոկտեմբերի 10-ի առավոտյան Ադրբեջանի զինված ուժերի դիվերսիոն խումբը Հադրութում տանը սպանել է երկու բնակչի` մորը և նրա հաշմանդամություն ունեցող որդուն. «Այսօր ԱՀ Մարդու իրավունքների պաշտպանի աշխատակազմը հստակ տեղեկություններ է ստացել, որ առավոտյան Հադրութ քաղաք ադրբեջանական դիվերսիոն խմբի ներթափանցման ժամանակ այդ խմբի անդամները տանը սպանել են Հադրութի երկու բնակչի՝ մոր ու նրա հաշմանդամություն ունեցող որդուն: Այժմ աշխատանքներ ենք տանում հանգամանքները պարզելու ուղղությամբ և վաղը հանդես կգանք ավելի մանրամասն տվյալներով: Խստագույնս դատապարտելով ադրբեջանական զինված ուժերի շարունակական վայրագ հանցագործությունները Արցախի բնակչության հանդեպ՝ պահանջում եմ միջազգային հանրությունից այս դեպքն արժանացնել համարժեք արձագանքի և հետամուտ լինել հանցագործներին համապատասխան պատժի ենթարկելու հարցում»,- գրել է Արցախի ՄԻՊ Արտակ Բեգլարյանը:
Ներկայումս Հադրութ քաղաքը Արցախի ՊԲ վերահսկողության տակ է:
Ադրբեջանական բանակը ռազմական հանցագործություն է կատարել նաև 2016թ-ի Ապրիլյան պատերազմի ընթացքում: Ադրբեջանական զորամիավորումները գյուղում գնդակահարել էին Թալիշի բնակիչ Վալերա Խալափյանին և նրա կնոջը՝ Ռազմելային, կտրել նրանց ականջները։ Նրանք գնդակահարել էին նաեւ 1924 թվականին ծնված Մարուսյա Խալափյանին:
Նորայր Շողիկյան
