Օրվա թոփ թեման Նիկոլ Փաշինյանի կառավարության օրոք Արգիշտի Քյարամյանի հերթական «ազատում-նշանակում» օպերացիան է։ Բանն այն է, որ վերջինս երեկ Փաշինյանի կողմից կրկին նշանակվեց Քննչական կոմիտեի նախագահի տեղակալ։ Նա ԱԱԾ տնօրենի պաշտոնից ազատվել էր հոկտեմբերի 8-ին, որտեղ  պաշտոնավորեց շատ կարճ` ընդամենը 4 ամիս։ Ասել է, թե Քյարամյանը ԱԱԾ-Քննչական կոմիտե «տրանզիտի» մեջ է։ 

Քյարամյանի նշանակումը համացանցում տարատեսակ քննարկումների առիթ է տվել։ Ոմանք գտնում են, որ նա կապված է որոշ իրադարձությունների հետ և պատասխանատվության ենթարկվելու փոխարեն, փաստորեն, վերանշանակվում է։ Պատերազմի ավարտից հետո «Ազգային անվտանգություն» կուսակցության նախագահ Գառնիկ Իսագուլյանը հայտարարեց, որ անձնագրային բաժանմունքների ղեկավարների միջոցով 1400 հայկական անձնագիր է բաժանվել հայերեն իմացող ադրբեջանցիների, ինչն ապահովել է ԱԱԾ` այն ժամանակվա տնօրեն Արգիշտի Քյարամյանը: ԱԱԾ տնօրենի պաշտոնից նրա ազատումը կապվում է հենց այս հանգամանքի հետ։ Սակայն, թե ինչու Փաշինյանը որոշեց Քյարամյանին կրկին նշանակել պաշտոնի, այլ խոսակցության թեմա է։ Ըստ շրջանառվող լուրերի` նա՝ Քյարամյանը, պատերազմի օրերին գտնվելով Արցախում՝ տիրապետում է բազմաթիվ ինֆորմացիաներին և այս նշանակումով Փաշինյանը փորձում է հարաբերությունները չլարել նրա հետ, որպեսզի հարկ եղած դեպքում չբարձրաձայնի ներքին խնդիրների մասին։ 

Այսպիսով՝ համացանցային քննարկումներից պարզ է դառնում, որ բոլորին հետաքրքրում է երկու հարց, թե ինչո՞ւ Արգիշտի Քյարամյանը պատերազմի ամենաթեժ օրերին ազատվեց ԱԱԾ տնօրենի պաշտոնից, ի՞նչ անելու կամ չանելու համար, և ինչո՞ւ հետո գործուղվեց Քննչական։ 

Հիշեցնենք, որ Արգիշտի Քյարամյանը այս իշխանության օրոք բազմաթիվ պաշտոններ ստանձնեց․ նախ նշանակվեց ՊՎԾ պետի տեղակալ, այնուհետև մեկ օրով Քննչական կոմիտեի նախագահի տեղակալ, որից հետո ազատվեց պաշտոնից, նշանակվեց ԱԱԾ տնօրենի տեղակալ, այս պաշտոնից հետո նշանակվեց ԱԱԾ տնօրեն: Իսկ ահա արդեն 2 ամիս առաջ այս պաշտոնից ազատվելով՝ երեկ կրկին գնաց Քննչական։
 
Ստորև ներկայացնում ենք քաղվածք համացանցից․