Շուռնուխ գյուղի բնակիչները արդեն դուրս են եկել Ադրբեջանին անցնող՝ իրենց 12 տներից։ Այս մասին NEWS.am-ին հայտնեց Շուռնուխի գյուղապետ Հակոբ Արշակյանը։
«Մինչեւ հիմա ներքեւի թաղում էին, հիմա արդեն ասֆալտին կմոտենան։ Արդեն եկել են, մեր սահմանապահներն են այնտեղ, ես էլ իջնում եմ ներքեւ, թուրք գեներալ էլ կա, պետք է տեղակայման տեղերը որոշեն, որոշեն՝ որտեղ կանգնեն»,- ասաց գյուղապետը։
Տեղահանված ընտանիքների մեծ մասը, գյուղապետի փոխանցմամբ, գյուղում՝ ազատ տներում է տեղավորվել, մի քանիսն էլ գնացել են Գորիս, մեկը՝ Կապան։
Հիշեցնենք, որ ադրբեջանցիները մինչեւ հունվարի 5-ը ժամանակ էին տվել գյուղացիներին, որ ազատեն Ադրբեջանին անցնող հատվածում գտնվող 12 տները։ Գյուղացիներից ոմանք այրել են իրենց տները նախքան Ադրբեջանին հանձնելը։
Հիշեցնենք, որ սահմանազատումով պայմանավորված՝ Շուռնուխ գյուղը երկու մասի է բաժանվում, մեկ հատվածը՝ 12 տնով մնում է Ադրբեջանին, քանի որ սահմանն անցնում է գյուղը կիսող մայրուղիով։
