Հունվարի 22-26-ը տեղի է ունեցել Հայաստանի էկոնոմիկայի նախարար Վահան Քերոբյանի այցն Իրանի Իսլամական Հանրապետություն: Այցից սպասելիքները մեծ էին, թվում էր, թե կա հնարավորություն՝ Իրանի հետ սառեցված հարաբերությունները ռեստարտի ենթարկել: Սակայն, ծանոթանալով Իրանում ՀՀ դեսպանության տարած հաղորդագրությանը, հասկանում ենք, որ Քերոբյանի այցը հարևան երկիր ոչնչով չի տարբերվում թավշյա մյուս պաշտոնյաների միջազգային վոյաժներից և չի անցել առանց սկանդալների:
Պարզվում է, որ Քերոբյանի այցի ընթացքում չի ստորագրվել քիչ թե շատ ծանրակշիռ փաստաթուղթ, չկա որևէ տնտեսական ձեռքբերում, հուշագիր կամ համաձայնագիր, որը կխթաներ երկկողմ առևտրաշրջանառությունը: Մեծաթիվ պատվիրակությունը Թեհրան էր մեկնել, որպեսզի հանդիպի հայ գործարարների հետ և չնախատեսված այցեր կատարի մի շարք գործարաններ: Ընդ որում, ուշագրավ է, որ նախատեսված այցերից մեկը չի կատարվել՝ հինգ օրում նախարարը ժամանակ չի գտել: Իսկ ավելի իրատեսական է թվում մամուլում շրջանառվող այն լուրը, որ նախարարը իսլամական երկրում որոշել էր գինարբուք կազմակերպել և հաջորդ օրը պարզապես ի վիճակի չի եղել կատարել իր բուն պարտականությունները:
Այսքանից հետո դեռ կան մարդիկ, ովքեր զարմանք են արտահայտում հայ-իրանական հարաբերությունների վատթարացման կապակցությամբ: Միանշանակ է, որ նման պահվածք դրսևորող, որևէ շոշափելի առաջարկ կամ փաթեթ չունեցող իշխանության ներկայացուցիչներին Իրանը պարզապես չի կարող լուրջ կամ հավասարը հավասարի պես վերաբերվել:
