Հարկային մարմնի կողմից հրապարակվել է 2021 թվականի հունվար-դեկտեմբեր ամիսների ընթացքում առաջին 1000 խոշոր հարկ վճարողների կողմից վճարված հարկերի վերաբերյալ տեղեկատվությունը:
ՊԵԿ-ից հայտնում են, որ 1000 խոշոր հարկ վճարողների կողմից 2021թ. 12 ամիսների ընթացքում պետական բյուջե, ընդհանուր առմամբ, վճարվել է ավելի քան 1 տրիլիոն 206 մլրդ դրամ: Հարկային մարմին կատարված վճարումների գումարը կազմել է ավելի քան 989 մլրդ 980 մլն դրամ, իսկ մաքսային մարմին կատարված վճարումների գումարը կազմել է ավելի քան 216 մլրդ 881 մլն դրամ։
1000 խոշոր հարկ վճարողների վերաբերյալ ցանկերը հասանելի են ՊԵԿ պաշտոնական կայքի «Հարկ վճարողների վերաբերյալ տեղեկատվական ցանկեր» բաժնում:
Ցանկը հրապարակվել է հիմք ընդունելով ներկայումս գործող ՀՀ կառավարության որոշմամբ սահմանված չափորոշիչները, մասնավորապես' ցանկում ներառվել են պետական և համայնքային կառավարչական հիմնարկները:
Ցանկի առաջին հորիզոնականում է «Զանգեզուրի պղնձամոլիբդենային կոմբինատը», որի հարկերը կազմել են 48,8 մլրդ դրամ: Երկրորդ տեղում «Գազպրոմ Արմենիան» է, որը վճարել է 47,8 մլրդ դրամ: Երրորդ տեղում ՊՆ աշխատակազմն է (42,6 մլրդ դրամ), 4-րդ տեղում է «Գրանտ Տոբկոն» (42,1 մլրդ դրամ), իսկ առաջին 5-յակը եզրափակում է «Գեոպրոմայնինգ Գոլդը» (20,8 մլրդ դրամ):
Երկրորդ հնգյակում են հետեւյալ ընկերությունները.
«Ինթերնեշնլ Մասիս տաբակ»
«CPS oil»
«ՄՏՍ Հայաստան»
«Ֆլեշ»
«Թեղուտ»:
