Անվտանգության ինչ կանոնների պետք է դիմել գազի արտահոսքի առկայության դեպքում։
Այս մասին կենցաղային պայմաններում այրվածքների ռիսկերի և դրանց դեմ իրականացվող կանխարգելիչ քայլերի թեմայով ասուլիսի ժամանակ հայտնել է ՀՀ ՆԳՆ փրկարար ծառայության Ճգնաժամային կառավարման ազգային կենտրոնի օպերատիվ հերթափոխի հրահանգիչ, փ/ծ մայոր Արթուր Վարդանյանը։
«Կան դեպքեր, երբ անջատված է լինում արտահոսքը արձանագրող սարքը, մարդիկ պատճառաբանում են հոսանքի խնդրի կամ ձայնի համար, սակայն անվտանգության կանոնները սկսվում են այդտեղից։ Եթե գազօջախը խնդիր ունի, պետք է հրատապ դիմել մասնագիտական ծառայությունների։ Եթե անգամ արդեն տեղի է ունեցել արտակարգ պատահարը, պետք է հասկանալ, թե ինչ անել։ Կան դեպքեր, երբ մարդիկ չեն կարողանում ժամանակին առաջին օգնություն ցուցաբերել այրվածքների հաղթահարման դեպքում, և մինչև հասցնում են հիվանդանոց, լինում են խորացված»,- նշել է նա։
Նրա խոսքով՝ դեպքեր են եղել, որ մարդիկ կենցաղում գազի բալոնը, որը նախատեսված է սուրճ կամ ճաշ տաքացնելու համար, օգտագործել կամ օգատգործում են պահածոներ փակելու համար և մեկ ժամից հետո տեղի է ունենում գազի արտահոսք պայթյունով, հրդեհի բռնկումով․ «Այդ ժամանակ դեպքեր են եղել, որ մարդիկ վախից, խուճապից այդ բալոնը շպրտել են դուրս ցերեկային ժամին, որտեղ երեխաներ են խաղացել, և հրաշքով պայթյունից կամ այլ դեպքից խուսափել ենք»։
Նա իրազեկում է, որ եթե կա գազի արտահոսք, անմիջապես ահազանգել մասնագետներին կամ վթարային ծառայության։
