27-ամյա երիտասարդի մահվան գործով նշանակվել է համալիր փորձաքննություն

13:29 - 14.Մայիս.2013

27-ամյա Ցոլակ Մկրտչյանի մահվան քրեական գործով որեւէ մեկի դեռ մեղադրանք չի առաջադրվել եւ նշանակվել է համալիր դատաբժշկական հանձնաժողովային փորձաքննություն: Ինչպես «Փաստինֆո»-ի թղթակցին հայտնեց տուժողի իրավահաջորդի ներկայացուցիչ, փաստաբան Ինեսսա Պետրոսյանը, փորձագետներին հարցեր կուղղվեն, թե արդյոք «Մասիսի բժշկական կենտրոնի» վիրաբուժական բաժանմունքի վարիչ Գևորգ Գրիգորյանի կողմից ճիշտ է կատարվել ու կազմակերպվել Ցոլակ Մկրտչյանի հետազոտությունը և ախտորոշումը, ամբուլատոր բուժումը: Փորձագետները պետք է պատասխանեն, թե բժշկի ու բուժաշխատողների կողմից թույլ տրվել են մասնագիտական բնույթի խախտումներ, եթե այո՝ ինչ խախտումներ և այդ խախտումները ինչ հետևանքներ են առաջացրել: Բարալգետաս դեղամիջոցի նշանակումը ու ներարկումը Ցոլակ Մկրտչյանի համար հակացուցված եղել է, թե ոչ, եթե հակացուցված եղել է, ինչ պատճառով, ճի՞շտ է կատարվել բարալգետասի ներարկումը, եթե ոչ՝ ապա ինչ խախտում է թույլ տրվել և ում կողմից: Ցոլակ Մկրտչյանի ներերակային ներարկումից առաջացած անաֆիլակտիկ շոկից հետո բժիշկ Գրիգորյանը և Մասիսի բժշկական կենտրոնի բուժաշխատողները ունեցել են արդյոք հնարավորություն հիվանդի փրկության համար, ձեռնարկել են անհրաժեշտ միջոցներ, թե ոչ: Այդ ընթացքում նրանք թույլ են տվել խախտումներ, թե ոչ:

Փորձաքննության եզրակացությունը ստանալուց հետո տուժող կողմը մտադիր է բարձրացնել մեղադրանք առաջադրելու հարցը:

Տուժող կողմը խորհրդատվություն է ստացել ռուսաստանյան բժիշկներից, ըստ այդմ, բարալգետաս դեղամիջոցի միջերակային ներարկում կարելի է անել մաքսիմում 2 մգ. չափաքանակով, այն էլ պետք է ներարկվի շատ դանդաղ՝ 1մգ-ը մեկ րոպեում: Մինչդեռ տվյալ դեպքում բժիշկը նշանակել է դեղամիջոցի ներարկում միանգամից 5 մգ չափաքանակով այն էլ այն բանից հետո, երբ պապավերին դեղամիջոցի առաջին ներարկումից հետո Ց.Մկրտչյանի արյան ճնշումն իջել էր 90/60-ի: «Ես տեղեկացված եմ, որ ցածր ճնշման պայմաններում ուղղակի անթույլատրելի է այդպիսի դեղամիջոցի նշանակումը և այդ քանակությամբ»,- ասաց Ինեսսա Պետրոսյանը:

Տուժողը ապրիլի 2-ին որովայնի շրջանում ցավերի պատճառով դիմել էր Մասիսի բժշկական կենտրոն, որտեղ ապրիլի 3-ի լուսադեմին մահացել է՝ անաֆիլակտիկ շոկից: Դիակի դատաբժշկական փորձաքննությունն արդեն իսկ հաստատել է, որ Ցոլակի մահը վրա է հասել անաֆիլակտիկ շոկի հետևանքով, ինչն իր հերթին առաջացել է բարալգետաս միջերկային ներարկումից: Փորձագետի եզրակացությամբ, Ց.Մկրտչյանն եղել է ամբողջությամբ առողջ, նրա բոլոր օրգանները եղել են պրակտիկորեն առողջ վիճակում:

Փորձագետի եզրակացությունը ստանալուց հետո բավարարվել էր տուժող կողմի բողոքը և երիտասարդի մահվան դեպքի փաստով հարուցվել էր քրեական գործ ՀՀ քրեական օրենսգրքի 130-րդ հոդվածի երկրորդ մասի հատկանիշներով՝ Բժշկական օգնություն ու սպասարկում իրականացնողների կողմից մասնագիտական պարտականությունների չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ: Գործով վարույթն իրականացնող մարմինը՝ ոստիկանության քննչական գլխավոր վարչության Մասիսի քննչական բաժանմունքը բավարարել է նաև Ցոլակ Մկրտչյանի եղբոր Վիրաբ Մկրտչյանի դիմումը իրեն տուժողի իրավահաջորդ ճանաչելու մասին: