«Ոստիկաններն» առևանգել են կնոջը` ընկերուհու տեղն իմանալու համար

10:30 - 6.Հունիս.2013

Վերաքննիչ քրեական դատարանի վարույթում է Ռուբեն Նազարյանի և Անանիա Կամանյանի գործով բերված վերաքննիչ բողոքների քննությունը: Գործը քննվել է Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում:

Դատարանի դատավճռով' նրանք մեղավոր են ճանաչվել նախնական հանցավոր համաձայնությամբ 2012թ. հուլիսի 17-ին Լիլիային առևանգելու համար:

Բացի այդ, Ռ.Նազարյանը, գտնվելով ժամկետային ծառայության մեջ, 4 անգամ ինքնակամ թողել է զորամասը, ինչի համար ևս դատարանը նրան մեղավոր է ճանաչել:

Ռուբեն Նազարյանի և Անանիա Կամանյանի կողմից Լիլիային առևանգելը ամուսնության նպատակով չի եղել:

Ըստ մեղադրանքի' Լիլիայի մտերիմ ընկերուհի Մարգարիտան բաժանվել է ամուսնուց' Անանիա Կամանյանից, և բնակություն հաստատել Լիլիայի տանը:

2012թ. հուլիսի 17-ին Կամանյանը զանգահարել է Լիլիային և խնդրել հանդիպել' Մարգարիտայի մասին խոսելու համար: Կարճ զրույցից հետո Ա.Կամանյանը հեռացել է Լիլիայից, որից հետո վերջինիս են մոտեցել երկու երիտասարդներ և ներկայացել որպես ոստիկանության Արաբկիրի բաժնի աշխատակից' ցույց տալով կարմիր վկայական: Որպես ոստիկան ներկայացողներից մեկը եղել է Ռուբեն Նազարյանը, ով Լիլիային հայտնել է, թե նրան պետք է տանեն ոստիկանության Արաբկիրի բաժին:

Սակայն նրան տարել են ինչ-որ կիսաքանդ բնակարան, որտեղ էլ հայտնել են, որ իրենց նպատակը Անանիային և Մարգարիտային գտնելն է: Այնուհետև նշված բնակարան է եկել նաև Ա.Կամանյանը և Լիլիայից պահանջել, որ նա զանգահարի Մարգարիտային և հանդիպում նշանակի:

Գործի նախաքննությամբ Լիլիայի առևանգմանը մասնակից երկրորդ անձի ինքնությունը չի պարզվել:

Տուժող Լիլիան դատարանում, այնուամենայնիվ, հայտնել է, որ ամբաստանյալների դեմ որևէ բողոք, պահանջ չունի' խնդրելով մեղմ պատիժ սահմանել:

Ա.Կամանյանը դատարանում իրեն մեղավոր չի ճանաչել, իսկ Ռ.Նազարյանն իրեն մեղավոր է ճանաչել մասնակիորեն' զորամասն ինքնակամ թողնելու համար միայն:

Դատարանը երկու ամբաստանյալներին էլ մեղավոր է ճանաչել և Ռ.Նազարյանին դատապարտել ազատազրկման' 4 տարի 6 ամիս ժամկետով, իսկ Ա.Կամանյանին' 4 տարի ժամկետով:

Պաշտպանական կողմը վերաքննիչ բողոքներ է բերել' խնդրելով առևանգման մեղադրանքով ամբաստանյալներին արդարացնել, իսկ զորամասն ինքնակամ լքելու համար Ռ.Նազարյանին նկատմամբ պայմանական դատապարտություն կիրառել: