Յակուտիայի նախագահ Եգոր Բորիսովը մեկ միլիոն ռուբլի է խոստացել նրան, ով տեղեկատվություն կհայտնի անհետ կորած 3-ամյա 2 աղջիկների մասին, հաղորդում է «РИА Новости»-ն՝ հղում անելով ՆԳՆ-ի մամլո ծառայության ղեկավար Ստանիսլավ Պլատոնովին:

Այանա Վինոկուրովան և Ալինա Իվանովան Յակուտսկից հունիսի սկզբին հյուր էին եկել Խանգալսկի շրջանի Սինսկ գյուղ: Հունիսի 24-ին ժամը 20:00-ին տատիկը նկատել է, որ տան մոտ խաղացող փոքրիկները չկան: Սկզբում նա աղջիկներին փորձել է ինքնուրույն փնտրել: Սակայն հաջողության չհասնելով՝ դիմել է օգնության:

Իսկ երեխաների անհետանալու հաջորդ օրը՝ հունիսի 25-ին, հարուցվել է քրեական գործ՝ «սպանություն» հոդվածի հատկանիշներով:

Երեխաների որոնման գործողություններն ընթանում են արդեն 6 օր: Դրան մասնակցում են մոտ 350 մարդ և 30 միավոր տեխնիկա: