Մայիսի 15-ին, Նոյեմբերյանի տարածաշրջանում տեղակայված զորամասում տեղի ունեցած միջադեպի հետևանքով հրազենային վիրավորում ստացած 19-ամյա Հրաչյա Սարգսյանը, ով գտնվում էր Կենտրոնական կլինիկական հոսպիտալում, տեղափոխվել է Կարմիր խաչի վերականգնողական կենտրոն՝ հետագա բուժումն այնտեղ ստանալու նպատակով: Այդ մասին «Փաստինֆո»-ի թղթակցի հետ զրույցում ասաց ՀՀ ՊՆ մամուլի խոսնակ Արծրուն Հովհաննիսյանը: Ինչպես ավելի վաղ տեղեկացրել էինք, Հրաչիկ Սարգսյանի ձախ կողմը պարալիզացված է, սակայն նրա վիճակը գնահատվել է բավարար, իսկ վերականգնողական գործընթացի համար երկար ժամանակ կպահանջվի: Հիշեցնենք, որ ՊՆ-ի տարածած պաշտոնական հաղորդագրության համաձայն, մայիսի 15-ին ՀՀ ՊՆ Նոյեմբերյանի տարածաշրջանում տեղակայված զորամասի պահակախմբի մուտքի դիտորդ, ժամկետային զինծառայող, շարքային Դավիթ Խաչատրյանն իրեն ամրակցված ԱԿՄ տեսակի ինքնաձիգից կրակոց էր արձակել, ինչի հետևանքով պահակախմբում ընդգրկված ժամկետային զինծառայող, շարքային Լյուքս Իշխանի Ստեփանյանը գլխի շրջանում ստացած հրազենային վիրավորումից տեղում մահացել էր, իսկ նույն զորամասի ժամկետային զինծառայող, շարքային Հրաչյա Սարգսյանը գլխի շրջանում ստացել հրազենային վիրավորում: Փաստի առթիվ ՀՀ ՊՆ քննչական ծառայությունում հարուցվել է քրեական գործ՝ ՀՀ քրեական օրենսգրքի 104 հոդվածի 2-րդ մասի 6-րդ կետով (սպանությունը՝ շատերի կյանքի համար վտանգավոր եղանակով):
