ՀՀ Նախագահ Սերժ Սարգսյանն այսօր շնորհավորական ուղերձ է հղել Ռուսաստանի Դաշնության Նախագահ Վլադիմիր Պուտինին՝ «Սոչի-2014» օլիմպիական խաղերում Ռուսաստանի հաղթանակի կապակցությամբ:
Սերժ Սարգսյանն ուղերձում նշել է.
«Հարգելի Վլադիմիր Վլադիմիրի,
Ընդունեք երախտագիտության անկեղծ խոսքերս Ձեր հրավերի համար՝ մասնակցելու 2014թ. Սոչիում ձմեռային օլիմպիական 22-րդ խաղերի բացման արարողությանը, որն առանձնանում էր իր նրբաճաշակությամբ, խորհրդանշականությամբ և յուրօրինակությամբ, ինչն ինձ վրա անմոռանալի տպավորություն թողեց: Աշխարհը հիրավի հետևում էր վառ և հուզիչ տեսարանի ու հիանում դրա անթերիությամբ:
Ոչ պակաս տպավորիչ էր նաև Օլիմպիադայի փակումը, ինչն անկասկած կարելի է բնութագրել որպես փակման ամենամասշտաբային արարողությունը ձմեռային խաղերի ամբողջ պատմության ընթացքում:
Օլիմպիադայի տեխնիկական հագեցվածությունը և պրոֆեսիոնալ կազմակերպվածությունը որակական նոր մակարդակի բարձրացրեցին օլիմպիական հետագա խաղերի անցկացման գործընթացը՝ դրանով իսկ ավելի բարձր նշաձող սահմանելով ապագա կազմակերպիչների համար:
Իսկ օլիմպիադայի պսակը դարձավ Ռուսաստանի հավաքականի՝ մեդալների հաշվով տարած բացարձակ հաղթանակը՝ 33 մեդալ ռեկորդային քանակով: Անկեղծորեն շնորհավորում եմ Ձեզ, Վլադիմիր Վլադիմիրի, այս նշանավոր իրադարձության՝ աննախադեպ հաղթանակի կապակցությամբ և մաղթում Ռուսաստանի եղբայրական ժողովրդին նորանոր հաջողություններ և նվաճումներ»:
