Թուրքիայի միակ հայկական գյուղը համարվող Վաքըֆի բնակիչները իրենց դժգոհությունն են հայտնել գյուղի կարգավիճակն ու անվանումը փոխելու կապակցությամբ: Հաթայի' քաղաքի կարգավիճակ ստանալուց հետո Վաքըֆը վերածվել է քաղաքի թաղամասի, սակայն դրա հայ բնակիչները հայտարարել են, որ ցանկանում են, որպեսզի այն «Վաքըֆ թաղամաս»-ի փոխարեն կոչվի «Վաքըֆ գյուղի թաղամաս»: Այս մասին տեղեկացնում է «Ակոս» պարբերականը:
21 տարի Վաքըֆի գյուղապետի պաշտոնը զբաղեցնող Բերչ Քարթունը նշել է, թե քանի որ Թուրքիայում այլևս հնարավոր չէ գտնել հայաբնակ մեկ այլ գյուղ, երկրի ներսում և դրսում իրենց ճանաչում են հենց «Վաքըֆ գյուղ» անվանումով: «Ավելի վաղ մեզ հիշել են ու ճանաչել գյուղ անվանումով: Մեզ կտխրեցնի, եթե գյուղի անունը ջնջվի: Ցանկանում ենք, որ այսուհետ այն գոնե անվանվի «Վաքըֆ գյուղի թաղամաս»: Նախաձեռնություն ենք սկսել մեր գյուղի անվանումը չփոխելու համար»,- հայտնել է գյուղապետը' հույս ունենալով, որ երկրի իշխանությունները ընդառաջ կգնան իրենց այս ցանկությանը:
Թուրքիայի խորհրդարանի կողմից ընդունված օրինագծով' 500 հոգուց պակաս բնակչություն ունեցող գյուղերը կորցնում են առանձին վարչական միավորի կարգավիճակը, կցվում են մոտակա մեծ բնակավայրերին եւ զրկվում գյուղապետ ունենալու իրավունքից: Թուրքիայի միակ հայկական Վաքըֆ գյուղում այսօր 35 տներում բնկավում է 135 մարդ: Գյուղն ունի իր գյուղապետը, եկեղեցին, հյուրանոցն ու մշակույթի կենտրոնը:
