Քաղաքացիները Մարդու իրավունքների պաշտպանի գրասենյակ ամենաշատը դիմում են հիմնականում իրավապահ մարմինների հետ կապված խնդիրներով: Այս մասին ազգային ժողովի մարդու իրավունքների պաշտպանության և հանրային հարցերի և ֆինանսավարկային և բյուջետային հարցերի մշտական հանձնաժողովների համատեղ նիստում ՀՀ 2013թ. պետական բյուջեի կատարողականի քննարկման ժամանակ ասաց մարդու իրավունքների պաշտպան Կարեն Անդրեասյանը' պատասխանելով ՀՀԿ խմբակցության պատգամավոր Խոսրով Հարությունյանի հարցին: «Թվում է, թե մեր երկրում սոցիալ-տնտեսական խնդիրներն ավելի շատ են և հիմնական բողոքները պետք է լինեն այս ոլորտից, սակայն մարդիկ շարունակում են ավելի շատ բողոքել իրավապահ համակարգից՝ հիմնականում դատարաններից և դատախազությունից, իրավապահ մարմինների հետ առնչությունից»,-ասաց Անդրեասյանը:
Անդրեսյանը տեղեկացրեց, որ իրավապահ մարմիններից դժգոհություններին հաջորդում են արդեն սոցիալ-տնտեսական խնդիրների հետ կապված դիմումները:
ՄԻՊ-ը ավելի շատ դիմումներ է ստանում Շիրակի, Լոռիի և Սյունիքի մարզերից: Կարեն Անդրասյանի կարծիքով, դա կապված է նրա հետ, որ ՄԻՊ-ն այդ մարզերում գրասենյակներ ունի: «Այդ մարզերի բնակիչները մեզ ավելի մոտ են, և միգուցե դրա հետ է կապված, որ նրանք ավելի ակտիվ են, սակայն սա միայն իմ կարծիքն է»,- եզրափակեց Անդրեասյանը:
