Հայաստանում իրականացվող սահմանադրական և պետաիրավական բարեփոխումների համատեքստում առավել արդիական է դարձել մարդու իրավունքների իրական պաշտպանություն ապահովող համակարգերի ներդրման հարցը: Այս մասին մարդու իրավունքների պաշտպանության ազգային ռազմավարությունից բխող միջոցառումների ծրագրի մեկնարկին նվիրված միջացառման ժամանակ իր ելույթում ասաց ՀՀ արդարադատության նախարար Հովհաննես Մանուկյանը: «Պետությունը սեփական իրավական համակարգը պետք է զարգացնի՝ առանցքում ունենալով մարդուն և նրա արժանապատվությունը: Այս իմաստով կարևոր նշանակություն ունեցավ Նախագահի կարգադրության հիման վրա մարդու իրավունքների պաշտպանության ազգային ռազմավարության մշակումը, ոը փետրվարին ընդունվեց կառավարության կողմից»,- ասաց Մանուկյանը:
Նա ընդգծեց, որ կառավարությունն այս ծրագիրը համարում է մարդու իրավունքների պաշտպանության առումով համակարգված քաղաքականության իրականացման կարևորագույն գործիք: «Ծրագրի նպատակն է ապահովել Սահմանադրությամբ և միջազգային պայմանագրերով երաշխավորված Հայաստանի Հանրապետության քաղաքացիների իրավունքների պաշտպանությունը»,- ասաց նա:
Նախարարը կարևորում է ծրագրի մշակման գործում բոլոր շահագրգիռ կողմերի մասնակցությունը: Նա առաջին հերթին կարևորում է համագործակցությունը միջազգային գործընկերների և քաղաքացիական հասարակության ներկայացուցիչների հետ: «Այս ծրագրի շրջանակներում նշանակալի բաղադրիչներից է նաև հանրության մասնակցությունը պետության կարևորագույն որոշումների կայացմանը»,- ընդգծեց Մանուկյանը՝ հավելելով, որ հասարակությունն առավել քան ինտեգրված պետք է լինի կառավարության որոշումների կայացման, մշակման և հետագայում նաև դրանց իրականացման գործում: Նախարարի խոսքով՝ այդ դեպքում հանրության աչքին կառավարության որոշումներն առավել լեգիտիմ կլինեն, իսկ պետությունը հնարավորություն է ստանում առավել արդյունավետ դարձնել իր որոշումները:
Մանուկյանը կարևորում է նաև ծրագրի մշակմանը և իրականացմանը պետական համապատասխան մարմինների՝ մարդու իրավունքների պաշտպանի, իրավապահ մարմինների և այլ կառույցների մասնակցությունը:
Նա ընդգծեց, որ ծրագրում հստակ երևում են հիմնական թիրախները՝ առողջության ապահովում, կրթության, սոցիալական պաշտպանության իրավունքը և այլն: «Միևնույն ժամանակ պետք է ասեմ, որ ծրագրում ամրագրված միջոցառումները սահմանափակված չեն և լինելու են շարունակական: Սա կենդանի փաստաթուղթ է, որ անընդհատ գտնվելու է դինամիկ զարգացման փուլում: Մենք չենք սահմանափակվելու մեկ ծրագրի իրականացմամբ, այլ անընդհատ փոփոխությունների ենք ենթարկելու այս ծրագիրը»,- ասաց Մանուկյանը:
Հովհաննես Մանուկյանը հույս հայտնեց, որ ծրագրով նախատեսված միջոցառումների իրականացումը դրական ազդեցություն կունենա Հայաստանում մարդու իրավունքների իրական և արդյունավետ պաշտպանության համակարգի ամրապնդման վրա:
ՄԱԿ-ի նիստերի դահլիճում հունիսի 30-ին տրվեց Մարդու իրավունքների պաշտպանության ազգային ռազմավարությունից բխող միջոցառումների ծրագրի մեկնարկը: Միջոցառմանը մասնակցում էր նաև ՀՀ վարչապետ Հովիկ Աբրահամյանը: Ելույթներ ունեցան Հայաստանում ԵՄ պատվիրակության ղեկավարի ժամանակավոր հավատարմարար Դիրկ Լորենցը, Եվրոպայի խորհրդի երևանյան գրասենյակի ղեկավար Օլեկսանդր Պավլյուկը, ԵԱՀԿ երևանյան գրասենյակի ղեկավարի տեղակալ Ուիլյամ Հանլոն:
