Ադրբեջանական բանակում զինծառայողների մահվան հետ կապված բողոքի ակցիայի կոչերը իշխանությունները կապում են ներքին իրավիճակը սրելու հետ, եւ սկսել են ձերբակալել նման կոչեր հնչեցնողներին:

Ինչպես հաղորդում է «Արմենպրես»-ը, «Ազադլըգ»-ը հայտնում է, որ Սաաթլըի շրջանում բերման է ենթարկվել ընդդիմադիր «Ժողովրդական ճակատ» կուսակցության ակտիվիստ Ռուսլան Նասիրլիի հայրը: Նշվում է, որ Ռուսլան Նասիրլին նախօրեին երիտասարդությանը բողոքի ակցիաների կոչ էր արել' կապված բանակում մեծ թվով զինծառայողների մահվան հետ:

«Այսօր նրանց տուն են եկել ոստիկանության աշխատակիցները: Ռուսլանը տանը չի եղել, եւ նրանք ոստիականական բաժանմունք են տարել նրա հորը»,- գրում է թերթը:

Ադրբեջանի իշխանությունների խոսափող haqqin.az լրատվական կայքը, որի գլխավոր խմբագիր Էյնուլլա Ֆաթուլլաեւը ղարաբաղյան պատերազմի տարիներին Աղդամի մոտակայքում տեղի ունեցած դեպքերը (Ադրբեջանը դա անվանում է Խոջալուի ողբերգություն) ժողճակատի կատարած հանցագործություն որակելու համար 8 տարվա ազատազրկման էր ենթարկվել եւ բանտից ազատվելուց հետո դարձել մոլի իշխանամետ, համարում է, որ «Ժողճակատը եւ ընդդիմությունը զորքերի շփման գծում ողբերգական իրադարձություններն օգտագործում են երկրում սոցիալ-քաղաքական լարվածությունը սրելու համար»:

«Այն դեպքում, երբ ադրբեջանցի զինվորները զոհվում են հայերի հետ մարտերում, ընդդիմությունը դարձյալ անուղղակիորեն ձեռք է մեկնում հայերին եւ, փորձելով սրել իրադրությունը, երկրորդ հայկական ճակատն է բացում երկրի ներսում»,- գրում է կայքը' նշելով, որ ընդդիմությունը ցանկանում է կրկնել նախանցյալ տարվա մարտին Բաքվի կենտրոնում զինվորների մահերի դեմ երիտասարդական բողոքի ակցիաները: