ՀՀ վարչապետ Հովիկ Աբրահամյանն օգոստոսի 8-ին աշխատանքային այցով մեկնել է Արագածոտնի և Արմավիրի մարզեր:
Ինչպես «Արմենպրես»-ին տեղեկացրին ՀՀ կառավարության տեղեկատվության և հասարակայնության հետ կապերի վարչությունից, երկրի վարչապետը նախ դիտայց է կատարել Հյուսիս-հարավ ճանապարհային միջանցքի ներդրումային ծրագրի Տրանշ 2-ի՝ Աշտարակ-Թալին հատվածի շինհրապարակում: Կառավարության ղեկավարին զեկուցվել է կատարված և ընթացիկ աշխատանքների վերաբերյալ, ներկայացվել են հետագա քայլերը:
Հովիկ Աբրահամյանը հետաքրքրվել է նաև Տրանշ 1-ի' Երևան-Աշտարակ, Երևան-Արարատ կատարման ընթացքով և հանձնարարել շինաշխատանքներն ավարտին հասցնեÕ ¬ սահմանված ժամանակացույցին համապատասխան:
Հյուսիս-հարավ ճանապարհային միջանցքի ներդրումային ծրագրի Տրանշ 2-ի շրջանակում նախատեսվում է Աշտարակ-Թալին 41.9 կմ երկարության հատվածի վերակառուցում և ներկայումս երկշարք ճանապարհի լայնացում մինչև քառաշարք ճանապարհ: Տրանշ 2-ի վարկային համաձայնագիրը կնքվել է 2011 թ. մայիսի 30-ին: Նախագծային խորհրդատվական աշխատանքներն իրականացնում է ֆրանսիական «Էջիս Բիսիոմ Ինտերնեշնլ» ընկերությունը, կապալառու կազմակերպությունն է իսպանական «Կորսան Կորվիամ Կոնստրուկսյոն Էս Ա» ընկերությունը:
Այնուհետև Հովիկ Աբրահամյանն ուղևորվել է Թալինի տարածաշրջանի Եղնիկ համայնք՝ շրջել գյուղի դպրոցի շենքում, ապա համայնքի բնակիչների հետ քննարկել նրանց հուզող խնդիրները: Վարչապետի հետ զրույցում գյուղացիները բարձրացրել են համայնքի՝ խմելու ջրով ապահովման, դպրոցի շենքի, գյուղամիջյան ճանապարհների վերանորոգման և այլ հարցեր:
Կառավարության ղեկավարը հանձնարարել է պատասխանատուներին 10 օրվա ընթացքում կազմակերպել համայնքում խմելու ջրի 2500 մ խողովակի անցկացումը և ներկայացնել դպրոցի մարզադահլիճի վերանորոգման նախագիծ-նախահաշիվ: Ի պատասխան գյուղացիների մեկ այլ հարցի՝ Հովիկ Աբրահամյանն առաջարկել է արոտավայրերն օգտագործել պայմանագրային վարձակալության հիմունքով, ինչին բնակիչները համաձայնվել են:
Գործադիրի ղեկավարն այցելել է նաև Թալին քաղաքի մանկական գեղարվեստի դպրոց, որը վերակառուցվում է Հայաստանի սոցիալական ներդրումների հիմնադրամի ծրագրով՝ վերահատակագծումով: Վարչապետին տեղեկացրել են, որ 64 աշակերտ ունեցող կրթօջախի վերականգնման աշխատանքները կավարտվեն մինչև ս.թ. սեպտեմբերի 1-ը:
Այժմ կատարվում են հատակների, սանհանգույցների, էլեկտրասնուցման, ջրամատակարարման, գազամատակարարման, կոյուղու, օդափոխության և ջեռուցման համակարգերի վերակառուցման, պատուհանների, տանիքների փոխարինման և այլ աշխատանքներ: Կառավարության ղեկավարի հանձնար արականով դպրոցին 10 օրվա ընթացքում կտրամադրվի նոր գույք:
Հովիկ Աբրահամյանը եղել է նաև Թալինի տարածաշրջանի Դաշտադեմ գյուղում՝ շրջայց կատարել համայնքի պատմամշակութային միջնադարյան ամրոցային համալիրում: Հուշարձանի տարածքի ուսումնասիրման և վերականգնման նպատակով 2006-2008 թթ. ՀՀ պետական բյուջեից հատկացվել է շուրջ 370 մլն ՀՀ դրամ:
Ամրոցի հետագա վերականգնման աշխատանքները նախատեսվում է իրականացնել ԱՄՆ-ի դեսպանների մշակութային արժեքների պահպանության հիմնադրամին ներկայացված Դաշտադեմ ամրոցի և նրա շրջակայքում գտնվող մշակութային ժառանգության, տարածքների ուսումնասիրման, գնահատման, վերականգնման, օգտագործման և հանրահռչակման համալիր ծրագրի շրջանակում: Դաշտադեմ համայնքի բնակիչների հետ Հովիկ Աբրահամյանը զրուցել է գյուղի խնդիրների, մասնավորապես, ոռոգման ջրի հարցի շուրջ՝ խոստանալով հնարավորության դեպքում լուծում տալ խնդրին:
Կառավարության ղեկավարի այցի վերջին կանգառը Արմավիրի մարզի Մուսալեռ համայնքն էր: Վարչապետը շրջել է Մուսալեռան հերոսամարտի պատմության և մուսալեռցիների ազգագրության թանգարանում, որը Սարդարապատի հերոսամարտի հուշահամալիրի, հայոց ազգագրության և ազատագրական պայքարի պատմության ազգային թանգարանի մասնաճյուղն է: Հովիկ Աբրահամյանին մանրամասներ են ներկայացվել Մուսալեռան հերոսամարտի թանգարանի և հուշահամալիրի բարեկարգման աշխատանքների ծրագրի վերաբերյալ:
