Արցախի Հանրապետության մշակութային քաղաքականությունը վերջին տարիներին երկու հիմնական ուղղություն ունի: Այս մասին Ստեփանակերտում լրագրողների հետ հանդիպման ժամանակ ասաց ԼՂՀ մշակույթի նախարար Նարինե Աղաբալյանը:
«Առաջինը մշակութային ինքնության վերականգնումն ու պահպանումն է, երկրորդը՝ հենց մշակույթի միջոցով Արցախն աշխարհին ներկայացնելը»,- «Արմենպրես»-ի հաղորդմամբ, ասաց նախարարը:
Նա ընդգծեց, որ մշակութային ինքնության պահպանումն իրենք փորձում են անել հիմնականում ոչ նյութական մշակութային ժառանգության ուղղությամբ, քանի որ Արցախում հուշարձանների պահպանությունը գտնվում է զբոսաշրջության և պատմական միջավայրերի վարչության ենթակայության տակ:
«Մշակույթի նախարարության լիազոր մարմինը զբաղվում է ոչ նյութական մշակութային ժառանգությամբ՝ թանգարաններով և գրադարաններով»,- ասաց նա՝ ընդգծելով, որ վերջին տարիներին իրենք ոչ մշակութային ժառանգության ուղղությամբ բավականին քայլեր են ձեռնարկել:
Մասնավարապես, նախարարը տեղեկացրեց, որ հենց մշակույթի նախարարությունում ստեղծվել է Ղուկասյան եղբայրների անվան Արցախի բարբառի և ազգագրության ուսումնասիրության կենտրոն: Ղուկասյան եղբայրները շուշեցի այն հովանավորներն են, ում միջոցներով 100 տարի առաջ կառուցվել է նախարարության շենքը և նրանց անունով ստեղծվել է այդ կենտրոնը:
«Այդ կենտրոնի միջոցով մենք մի շարք ծրագրեր ենք իրականացնում: Նախ, եթե խոսենք ընթացիկ ծրագրերի մասին, ապա աշխատանքներ ենք տարել առկա նյութերը հավաքագրելու ուղղությամբ և երկու կարևոր մրցույթներ ենք հայտարարել, և հիմ ա արդեն դրանց ամփոփման ժամանակն է»,- ասաց նախարարը:
Առաջին մրցույթը, որ հայտարարվել է նախարարության կողմից, արցախյան գորգարվեստի մրցույթն է, երկրորդը՝ «Տոհմածառ» մրցույթը: Նարինե Աղաբալյանն ընդգծում է, որ գորգարվեստը արցախյան մշակութային ժառանգության կարևոր բաղադրիչն է, քանի որ Արցախը հայտնի է եղել որպես գորգագործության և գորգարվեստի նշանավոր կենտրոն:
«Եվ ուղղակի բոլորդ ականատես եք, թե ինչպես ենք մենք կորցրել այդ ժառանգությունը՝ պատշաճ ուշադրություն չդարձնելով: Այսօր աշխարհում արցախյան գորգերը ներկայացվում են որպես ադրբեջանական կամ, լավագույն դեպքում, որպես կովկասյան գորգեր»,- ասաց նա:
Այսօր ԼՂՀ մշակույթի նախարարությունն այդ ուղղությամբ հստակ քայլեր է ձեռնարկում: Մասնավորապես, Շուշիում բացվել է գորգերի թանգարանը, որը թեև իրենից մասնավոր հավաքածու է ներկայացնում, սակայն գործում է պետական աջակցությամբ: Այստեղ շատ լավ հիմքի վրա է դրվել պետություն-մասնավոր համագործակցությունը: «Նաև Արցախի պատմաերկրագիտական թանգարանում մենք անընդհատ համալրում ենք մեր գորգերի հավաքածուն և պատրաստվում ենք նաև գիտական ուսումնասիրություններ հրատարակել արցախյան գորգերի վերաբերյալ:
Դա արվում է գորգագործության վերականգմանը զուգահեռ: Այսինքն, մենք այստեղ գործում ենք տարբեր ուղղություններով: Մի կողմից'կառավարությունը քայլեր է ձեռնարկել, որպեսզի Արցախում գորգագործությունը վերականգնվի, մյուս կողմից մշակույթի նախարարությունը փորձում է վերականգնել հենց գորգագործության ավանդույթները, որովհետև արցախյան գորգերն ունեն առանձնահատկություններ, և մենք պետք է փորձենք դրանք վերականգնել ու պահպանել»,- ասաց նա:
Նախարարն ընդգծեց, որ արցախյան գորգարվեստի մրցույթ է հայտարարվել, որպեսզի ճանաչելի դարձվի արցախյան գորգը, որովհետև բնակիչներից շատերը չեն էլ ճանաչում, թե որն է արցախյան գորգը: Նրա խոսքով, առաջին հերթին դա պետք է ճանաչելի լինի արցախցիների և առհասարակ հայերի համար: «Մենք այս մրցույթի շրջանակներում պայման ենք դրել, որպեսզի անպայման լինի արցախյան գորգերի կրկնապատկերը: Մրցույթն արդեն ավարտվին է մոտենում, և մոտակա օրերին մենք կամփոփենք արդյունքները»,- ասաց Աղաբալյանը:
Անդրադառնալով տոհմածառի մրցույթին՝ Աղաբալյանը նշեց, որ այն ևս շատ կարևոր և յուրահատուկ է: «Մեր խնդիրները գալիս են նաև նրանից, որ կտրվել է կապը մեր արմատների հետ: Եթե հարցնեք, երևի շատ քչերը կարող են հիշել իրենց տատ ու պապի ծնողների անուն ազգանունները կամ որևէ տվյալ:
Դրա համար մենք մտածել ենք իրականացնել այս ծրագիրը, որպեսզի մատաղ սերնդի ուշադրությունը հրավիրենք իրենց նախնիների վրա և այս մրցույթի միջոցով փորձենք վերականգնել այդ կապը: Պայման է դրվել 150 տարվա կտրվածքով ներկայացնել սեփական տոհմածառը»:
Նախարարն ընդգծեց, որ այս մրցույթի համար էլ արդեն բավականին հայտեր են ընդունվել և դարձյալ մոտ օրերս կամփոփվեն արդյունքները: Նա նաև ընդգծեց, որ այս մրցույթներն այսուհետ ամենամյա բնույթ են կրելու:
