ՀՀ ՊՆ վարչական համալիրում, հոկտեմբերի 13-ին, պաշտպանական գերատեսչության ղեկավար Սեյրան Օհանյանի գլխավորությամբ անցկացվել է խորհրդակցություն' նվիրված նյութատեխնիկական միջոցների ապահովման, գնումների գործընթացի ծրագրավորման և պլանավորման, ինչպես նաև ԶՈւ-ում կարգապահության ամրապնդման խնդիրների քննարկմանը: Հեռահաղորդակցության միջոցներ ի և տեսակապի շնորհիվ խորհրդակցությանը ներգրավված էր նաև բանակային զորամիավորումների հրամկազմը:
Ինչպես «Արմենպրես»-ին փոխանցեցին ՀՀ Պն տեղեկատվության եւ հասարակայնության հետ կապերի վարչությունից, խորհրդակցությանը մասնակցում էին ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը, պաշտպանության նախարարի, ԶՈՒ ԳՇ պետի տեղակալները, վարչությունների և առանձին բաժինների, բաժանմունքների պետեր, բարձրաստիճան այլ զինվորականներ, քաղաքացիական հատուկ ծառայողներ: Հայկական երկու հանրապետությունների զինված ուժերի փոխգործ ակցության շրջանակում տեսակապի միջոցով խորհրդակցությանը մասնակցում էր նաև ԼՂՀ պաշտպանության բանակի ղեկավար կազմը:
Նիստի ժամանակ Սեյրան Օհանյանը ընդգծեց, որ չնայած գնումների գործընթացի բարելավման և կոռուպցիոն ռիսկերի նվազեցման ուղղությամբ ՊՆ և ԶՈՒ ղեկավար կազմի կողմից իրականացվող մեծածավալ աշխատանքներին, այդուհանդերձ, որոշ սպաների անհետևողական աշխատանքի և պարտականությունները ժամանակին չկատարելու պատճառով ի հայտ են գալիս մի շարք խնդիրներ, որոնց մեղավորները կարճ ժամանակ անց հայտնվում են իրավապահ մարմինների ուշադրության կենտրոնում' արժանանալով խիստ պատժի:
Անթույլատրելի համարելով որոշ զինվորականների ցուցաբերած անփութությունը և հրահանգելով բացառել նմանատիպ երևույթները, Սեյրան Օհանյանը նշեց, որ անհրաժեշտ է միասին ուղիներ փնտրել իրավիճակը կարգավորելու համար:
Ըստ այդմ' պաշտապանական գերատեսչության ղեկավարը հույս հայտնեց, որ խորհրդակցության ընթացքում ներկայացված վերլուծությունները, տրված ցուցումներն ու հանձնարարականներն ուղենիշ կհանդիսանան բոլոր զինծառայողների և քաղաքացիական հատուկ ծառայողների գործունեության, գնումների գործընթացի հետագա բարելավման համար:
