Հայաստանի Հանրապետության և Բելառուսի Հանրապետության պաշտպանության նախարարությունների միջև 2014թ. երկկողմ համագործակցության պլանի համաձայն' նոյեմբերի 3-ից 6-ը Հայաստանում է գտնվում Բելառուսի պաշտպանության նախարարության միջազգային ռազմական համագործակցության վարչության պետի գլխավորած պատվիրակությունը:
Ինչպես «Արմենպրես»-ին տեղեկացրին ՀՀ կառավարության տեղեկատվության և հասարակայնության հետ կապերի վարչությունից, այցի շրջանակներում նոյեմբերի 3-ին ՀՀ պաշտպանության նախարարությունում կայացած բանակցությունների ընթացքում ամփոփվել են հայ-բելառուսական երկկողմ ռազմական համագործակցության 2014թ. արդյունքները, մշակվել է 2015թ. համագործակցության պլանի նախագիծը: Հանդիպումների ընթացքում քննարկվել են նաև տարածաշրջանային անվտանգությանն առնչվող հարցեր:
Նույն օրը Բելառուսի պաշտպանական գերատեսչության պատվիրակությանն ընդունել է ՀՀ պաշտպանության նախարարի առաջին տեղակալ Դավիթ Տոնոյանը:
Բանակցությունների արդյունքում նախատեսվում է ստորագրել Հայաստանի և Բելառուսի պաշտպանության նախարարությունների միջև երկկողմ համագործակցության 2015 թվականի պլանը:
