Փարիզում տեղի ունեցած ահաբեկչությունը «Իսլամական պետության» մեսիջն էր ամբողջ աշխարհին, որ ինքը ոչ միայն Մերձավոր Արևելքում է, այլ նաև Եվրոպայում, և խմբավորումը նման մեթոդներով փորձելու է լուծել իրենց խնդիրները:
Հունվարի 12-ին լրագրողների հետ հանդիպմանը նման կարծիք հայտնեց ԱԺ «Ժառանգություն» խմբակցության պատգամավոր Թևան Պողոսյանը: «Ֆրանսիան այն երկիրն է, որտեղ ցանկացած մարդ կարող է պայքարել իր իրավունքների համար և հասնել արդարության: Սակայն այս դեպքում տվյալ գործողությունն իրականացրած անձինք իրենց իրավունքների համար չէին պայքարում, այլ փորձեցին ցույց տալ ամբողջ աշխարհին, որ «Իսլամական պետություն» ահաբեկչական խմբավորումն արդեն Եվրոպայում է և իր խնդիրները լուծելու է հենց նման մեթոդներով»,- «Արմենպրես»-ի հաղորդմամբ՝ նշեց պատգամավորը:
Անդրադառնալով հունվարի 11-ին Փարիզում տեղի ունեցած միասնության երթին՝ նվիրված Ֆրանսիայի մայրաքաղաքում հունվարի 7-9-ը իրականացված ահաբեկչությունների զոհերի հիշատակին, որին մասնակցել են շուրջ 50 երկրների ղեկավարներ՝ Թևան Պողոսյանն ընդգծեց, որ քաղաքակիրթ աշխարհն այդ երթով ցույց տվեց, որ դեմ է մարդասպանություններին և ահաբեկչություններին: Նա ընդգծեց, որ նման դեպքերից պետք է անել հետևություններ, հարգել մյուսների հավատը և իրավունքները՝ միևնույն ժամանակ պայքարելով սեփական իրավունքների համար, իսկ այդ պայքարի ճանապարհին բոլորը պետք է հա յտնաբերեն չարը և առաջին հերթին պայքարեն դրա դեմ:
Պատգամավորը չհամաձայնեց այն մտքի հետ, թե այս ահաբեկչությունը Եվրոպայի վատ միգրացիոն քաղաքականության հետևանքն է: Նա ընդգծեց, որ այստեղ խնդիրը ոչ թե միգրացիոն քաղաքականությունն է, այլ մարդկանց ընկալումները: Նրա խոսքով՝ սա քաղաքական նկատառումներով հաշվարկված ծրագիր էր, որը դեռ պետք է հասկանալ, թե ուր է տանելու:
«Ազատ դեմոկրատներ» կուսակցության փոխնախագահ Անուշ Սեդրակյանն էլ հակադարձեց տեսակետին, թե Փարիզի ահաբեկչությունը տեղի է ունեցել կրոնական հողի վրա: Նա նկատեց, որ հունվարի 11-ին կայացած սգո երթին իսլամական աշխարհը ցույց է տվել, որ գտնվում է քաղաքակրթական այն ճամբարում, որտեղ դատապարտելի են նման երևույթները:
Նա կարծիք հայտնեց, որ այսքանից հետո ոչ միայն Ֆրանսիայում, այլև ամբողջ Եվրոպայում և աշխարհում կխստացվեն հակաահաբեկչական միջոցառումները՝ նման դեպքերը բացառելու համար: «Ես կարծում եմ, որ Եվրոպան նոր պայքար կսկսի մարդկային արժեքների, իրավունքների հաստատման համար, որովհետև կարող եմ ասել, որ վերջին տարիներին այդ պայքարը մի փոքր «նստել էր» և ավելի շատ բյուրոկրատական բնույթ էր կրում»,- ասաց Սեդրակյանը:
Ֆրանսիայի մայրաքաղաք Փարիզում Charlie Hebdo խմբագրության վրա ահաբեկչական հարձակման հետևանքով զոհվել է 12 մարդ՝ 10 լրագրող, որոնց թվում' ամսագրի գլխավոր խմբագիր Ստեֆան Շարբոնիեն։ Ահաբեկչական հարձակումը մասնագետները կապում են ամսագրում զետեղված սուր ծաղրանկարների հետ ։ Ահաբեկչական գործողությունն իրականացրած Կուաշի եղբայրները Ֆրանսիայի ոստիկանության իրականացրած գործողության արդյունքում սպանվել են: Հունվարի 11-ին Փարիզում տեղի է ունեցել ահաբեկչության և անհանդուրժողականության դեմ պայքարում միջազգային հանրության միասնությունը խորհրդանշող երթ, որին մասնակցել են շուրջ հինգ տասնյակ պետությունների, կառավարությունների և միջազգային կազմակերպությունների ղեկավարներ, արտգործնախարարներ։ Երթին մասնակց ել է նաև ՀՀ արտաքին գործերի նախարար Էդվարդ Նալբանդյանը:
