«Ներիր, Հայաստան». այսպիսի վերտառությամբ է իր հոդվածն սկսել «Московский Комсомолец»-ի լրագրող Սերգեյ Գապոնովը' համոզմունք հայտնելով, որ Ռուսաստանի ղեկավարությունը և ժողովուրդը պետք է ներողություն խնդրեն հայ ժողովրդից, ծաղիկներ դնեն և հիշատակի մոմեր վառեն Հայաստանի դեսպանատան դիմաց' հարգելով Գյումրիում ընտանիքի սպանված անդամների հիշատակը: «Ար մենպրես»-ի փոխանցմամբ' ռուս լրագրողը նկատում է, որ հունվարի 12-ին Գյումրիում Ավետիսյանների ընտանիքի վեց անդամների սպանության մեջ մեղադրվող ռուս զինծառայող Վալերի Պերմյակովին Հայաստանի քննիչներին և դատարանին հանձնելը դեռ քիչ է:
Լրագրողը կոչ է անում իր երկրի բարձրաստիճան պաշտոնյաներին այցելել Հայաստան և ներողություն խնդրել հայ ժողովրդից: «Մեր բարձրաստիճան պաշտոնյաները պետք է հանդիպեն Հայաստանի նախագահի և ժողովրդի հետ: Եվ ոչ միայն դա: Ռուսական զինվորական համազգեստ կրող հանցագործի կողմից սպանվածների հարազատները ցմահ պետք է արժանան Ռուսաստանի օժանդակությանը: Եվ վերջապես դեսպանատան (ՌԴ-ում Հայաստանի) մոտ պետք է գնան մարդիկ, այնտեղ պետք է ծաղիկների բլուրներ առաջանան և վառվեն մոմեր»,- գրում է լրագրողը և հավելում. «Ահա այդ ժամանակ մենք չենք կորցնի մեր ընկերներին: Եվ այնժամ ես կտեսնեմ, որ իմ Ռուսաստանը մեծ պետություն է»:
Ռուսական «Взгляд» պարբերականն իր հերթին նշում է, որ Ռուսաստանը պետք է լուրջ հետևություններ կատարի Գյումրիում տեղի ունեցած ողբերությունից: «Գյումրի քաղաքում հայկական ընտանիքի գնդակահարությունը պատկերավոր կերպով ցույց տվեց, թե որքան փխրուն են Ռուսաստանի դիրքերը Անդրկովկասում, և թե որքան կարևոր են դրանք: Նման ողբերգությունները կարող են կոնֆլիկտի պատճառ դառնալ պաշտոնական Մոսկվայի և իր ամենամոտ դաշնակցի միջև»,- գրում է լրատվամիջոցը:
«Զինվորը մնում է բազայի հրամանատարության վերահսկողության ներքո, սակայն հետաքննությունը կիրականացվի հիմնականում հայ ոստիկանության կողմից: Սա տրամաբանական լուծում է բոլոր տեսանկյուններից' թե´ քաղաքական, թե´ քննչական: Հայաստանի իշխանությունների ներկայացուցիչները փորձում են հետևել իրավական ընթացակարգին' չվնասելով ոչ մեկի շահերին»,- հավելում է պարբերականը: Միաժամանակ ընդգծվում է, որ «տրամաբանական է ենթադրել, որ մեղավորության մեծ մասն ընկնում է բազայի սպաների ուսերին, ովքեր շատ բաներ աչքաթող են արել, սխալ են ար ել կամ առհասարակ ոչինչ չեն արել»:
Որոշ ռուսական լրատվամիջոցներ էլ իրենց հրապարակումներում քաղաքական երանգներ են հաղորդում Հայաստանում տեղի ունցող բողոքի ցույցերին, թեև մինչ օրս ցուցարարների և Երևանի ու Գյումրիի փողոցներ դուրս երկած հազարավոր մարդկանց հիմնական պահանջը Ավետիսյանների սպանության մեջ մեղադրվող Վալերի Պերմյակովին հայ իրավապահներին հանձնելն է:
BBC և The Moscow Times-ը, ներկայացնելով դեպքի մանրամասները, նշում են, որ միջադեպը լարվածություն է առաջացրել Հայաստանի և Ռուսաստանի միջև:
Բրիտանական մեկ այլ հեղինակավոր The Guardian-ն իր հերթին գրում է, սպանությունը անհարմար ժամանակահատվածում տեղի ունեցավ Ռուսաստանի համար, «որը վերջերս էր հայտարարել, որ պատրաստ է իր շարքերում ընդունել արտասահմանյան պայմանագրային զինծառայողների' խթանելու Հայաստանում, Բելառուսում, Տաջիկստանում և Ղրղզստանում գտնվող իր ռազմաբազներում ծառայող տեղաբնիկների թիվը»: Ըստ Guardian-ի' Ավետիսյանների սպանությունը հայ-ռուսական պատմական հարաբերությունների ամրությունն ստուգելու հերթական փորձությունն է:
