Փետրվարի 6-8-ը Ծաղկաձորում անցկացվում է «Ավագ և կրտսեր սերունդների երկխոսություն» խորագրով ծրագիրը։
Ինչպես «Արմենպրես»-ին տեղեկացրին Հայաստանի երիտասարդական հիմնադրամի մամուլի ծառայությունից, այն ՀՀ ոչ պետական բուհերի, օտարերկրյա բուհերի հայաստանյան մասնաճյուղերի և միջին մասնագիտական ուսումնական հաստատությունների ուսանողական խորհուրդների համատեղ կազմակերպվող եռօրյա քննարկումների շարք է:
Քննարկումների կիզակետում են ուսանողական խորհուրդների անելիքները, կիրականացվի փորձի փոխանակում, փորձ կարվի համատեղ ջանքերով առաջադրել ուսանողական մի շարք հիմնախնդիրների լուծումներ, կստեղծվեն ուսանողական ինքնակառավարման մարմինների համագործակցության նոր եզրեր:
«Ոչ պետական բուհերի ուսանողական կենտրոն» ՀԿ-ի նախագահ Արմինե Բարսեղյանը նշում է, որ իրենց նպատակն է մշտական կապ ապահովել ուսանողական խորհուրդների տարբեր սերունդների ներկայացուցիչների միջև։ Ուսխորհուրդների ավագ սերնդի անդամները միշտ իրենց խորհուրդներով կարող են աջակցել կրտսեր գործընկերներին։ Եվ այդ երկխոսությունը կնպաստի ուսանողական ինքնակառավարման մարմինների աշխատանքի արդյունավետությանը։
«Ավագ և կրտսեր սերունդների երկխոսություն» խորագրով ծրագիրը կազմակերպել են Հայաստանի երիտասարդական հիմնադրամը, «Ոչ պետական բուհերի ուսանողական կենտրոն» հասարակական կազմակերպությունը, միջին մասնագիտական ուսումնական հաստատությունների ուսանողական խորհուրդը։
