Արմավիրի մարզի առաջին ատյանի դատարանը Արտավազդ Մաթևոսյանին մեղավոր է ճանաչել ՀՀ քրեական օրենսգրքի 117-րդ հոդվածով նախատեսված հանցանքում և նրան դատապարտել տուգանքի ՀՀ նվազագույն աշխատավարձի յոթանասունապատիկի' 70.000 ՀՀ դրամի չափով: «Արմենպրես»-ի հաղորդմամբ' այս մասին է հաղորդում դատական տեղեկատվական համակարգը:

Երկու եղբայրների միջև բնակարանային վեճը, ըստ դատական հայցերի, կարծես թե հանգուցալուծում էր ստացել, սակայն բնակարանի բաժնեմասերը առանձնացնելուց հետո էլ վեճերը չեն դադարել և, ի վերջո, հանգեցրել քրեորեն հետապնդելի արարքի՝ դիտավորությամբ առողջությանը թեթև վնաս պատճառելուն:

Հերթական վիճաբանությունը ծագել է 2014թ. օգոստոսի 26-ին՝ ժամը 20:30-21:00-ի սահմաններում, Էլվերայի ու նրա հարս Ոսկու միջև՝ միջանցքի հատակը, փոշին սրբելու և աղբը թափելու հետ կապված: Վիճաբանության ընթացքում տուն է մտել Էլվերայի որդի Արտավազդը և տեսնելով, որ Ոսկին վիճաբանում է իր մոր հետ, միջամտել է վիճաբանությանը և Ոսկուն «մարմնական վնասվածք պատճառելու դիտավորությամբ հարվածներ է հասցրել նրա մարմնի տարբեր մասերին՝ պատճառելով ձախ բազկի վերին երրորդականի դրսային մակերեսի, ձախ բազկի վերին երրորդականի հետին մակերեսի և աջ բազկի միջին երրորդականի ներսային մակերեսի արյունազեղումների ձևով թեթև վնաս: Այնուհետև վիճաբանությանը միջամտել է Արտավազդ Մաթևոսյանի հետ այդտեղ գնացած նրա ընկերը, ով նրա մեջքից բռնելով և հետ քաշելով՝ Արտավազդ Մաթևոսյանին մի կողմ է տարել, որից հետո վիճաբանությունը դադարել է»:

Էլվերայի, նրա կրտսեր որդու Արտավազդ Մաթևոսյանի և մյուս կողմից ավագ որդու Արամ Մաթևոսյանի, նրա կնոջ՝ Ոսկու միջև բնակարանի բաժնեմասերի առանձնացման հարցի շուրջ անհաշտությունների և դատական հայցերի արդյունքում բնակարանը բաժանվել էր երկու մասի: Բնակարանամուտքը ընդհանուր է, իսկ բնակելի մակերեսի որոշ հատվածներ ընդհանուր օգտագործման են, ինչի հետ կապված' հաճախակի կենցաղային վեճեր են ծագել «հակամարտող կողմերի» միջև: