Հիվանդանոցից ոստիկանության Կոտայքի բաժնում մարտի 24-ին' ժամը 12.05-ին, հաղորդում է ստացվել, որ «տրավմատիկ շոկ 1, 2, կրծքավանդակի աջ կեսի և որովայնի հրազենային վնասվածք» ախտորոշմամբ իրենց մոտ է տեղափոխվել 1973թ. ծնված Կարեն Ա.-ն, իսկ ժամը 15.00-ին հաղորդում է ստացվել, որ «աջ ոտնաթաթի բութ մատի հրազենային վնասվածքով» բուժօգնության է դիմել 1981թ. ծնված Արտյոմ Ա.-ն:
Մեկնած օպերատիվ խումբը պարզել է, որ նույն օրը' ժամը 10.40-ի սահմաններում, Կարեն Ա.-ն իր երկու ընկերների հետ Արտյոմ Ա.-ին պատկանող բնակարանից փորձել են գողություն կատարել, սակայն իրենց կամքից անկախ հանցագործությունն ավարտին չեն հասցրել, քանի որ Արտյոմ Ա.-ն վերադարձել է տուն, նույն շենքի բակում վիճաբանել նրանց հետ, որի ընթացքում զենքն ուղղել են նրա ուղղությամբ, ապա «ՎԱԶ-211200» մակնիշի ավտոմեքենայով դիմել են փախուստի, սակայն Աբովյան քաղաքի և Նոր-Գեղի համայնքի ճանապարհի 3-րդ կմ-ին' Պարույր Սևակի 1-ին փողոցի թիվ 13 տան դիմաց, Կարեն Ա.-ն իջել է ավտոմեքենայից, իսկ իրեն հետապնդող Արտյոմ Ա.-ն և նրա ընկերը' 1986 թ. ծնված Վլադիսլավ Ա.-ն, փորձել են բռնել նրան, սակայն վերջինս իր մոտ եղած ատրճանակի փողն ուղղել է Արտյոմ Ա.-ի վրա, որից հետո վերջինս կռվի է բռնվել Կարեն Ա.-ի հետ, այդ ժամանակ վերջիններս վայր են ընկել գետին, իսկ Կարեն Ա.-ն ընկած վիճակում երկու անգամ անկանոն կրակել է ու ինքն իրեն և Արտյոմ Ա.-ին պատճառել հրազենային վնասվածք, որից հետո վերջիններս տեղափոխվել են հիվանդանոց:
Դեպքի վայրից հայտնաբերվել է ինքնաշեն թմբուկավոր ատրճանակ' լիցքավորված վեց փամփուշտով, որոնցից երկուսը կրակված վիճակում, մեկ բջջային հեռախոս:
Ձեռնարկված միջոցառումների շնորհիվ պարզվել է, որ Կարեն Ա.-ն ուրիշի գույքը գաղտնի հափշտակություն կատարելու դիտավորությամբ նախնական համաձայնության գալով 1973թ. ծնված Վահագ Դ.-ի և գործով ինքնությունը չպարզված անձի հետ՝ Բյուրեղավան քաղաքի 7 շենքի բնակարաններից մեկից գողություն կատարելու նպատակով, մարտի 24-ին' ժամը 10.40-ի սահմաններում, փորձել են հարմարեցված բանալիով բացել Արտյոմ Ա.-ին պատկանող բնակարանի դռան փականը, սակայն չեն կարողացել հանցագործությունն ավարտին հասցնել իրենց կամքից անկախ հանգամանքներում, քանի որ բնակարանի ներսից լսելով ձայներ' հեռացել են, իսկ շենքի բակում հանդիպելով տանտիրոջը' Արտյոմ Ա.-ին, Վահագ Դ.-ն ապօրինի հրազեն հանդիսացող ատրճանակով սպանության սպառնալիք է տվել նրան' պահանջելով թույլ տալ իրենց հեռանալ դեպքի վայրից, որից հետո Վահագ Դ.-ի ավտոմեքենայով շենքի բակից հեռացել են, տուժող Արտյոմ Ա.-ն հետապնդել է նրանց և Նոր Գեղի գյուղում նկատել է, որ հիշյալ ավտոմեքենայից իջել է Կարեն Ա.-ն, իսկ Վահագ Դ.-ն և անհայտ անձը ավտոմեքենայով հեռացել են:
Կարեն Ա.-ն ձերբակալված է: Նշանակվել է դատաբժշկական փորձաքննություն: Ձեռնարկված միջոցառումների և բացատրական աշխատանքների շնորհիվ Վահագ Դ.-ն մարտի 31-ին' ժամը 12.10-ին, ինքնակամ ներկայացել է ոստիկանության Վաղարշապատի բաժին և տեղափոխվել Կոտայքի բաժին: Ձեռնարկվում են միջոցառումներ անհայտ անձի ինքնությունը պարզելու և նրանց հայտնաբերելու ուղղությամբ: Կատարվում է քննություն:
