Ադրբեջանում արգելվում են ռազմական խնդիրների հասարակական քննարկումները: Ինչպես հաղորդում է «Արմենպրես»-ը' վկայակոչելով Meydan TV հեռեուստաալիքի կայքը, օրերս հրապարակած զեկույցում նման եզրակացության է հանգել ադրբեջանական «Խազար» ռազմական հետազոտությունների ինստիտուտը (Caspian Defense Studies Institute):
2015 թվականի առաջին եռամսյակում Ադրբեջանի անվտանգության եւ պաշտպանության հատվածում մարդու իրավունքների վիճակի մոնիտորինգի արդյունքների հիման վրա «Խազար»-ը հայտնել է, որ զեկույցի պատրաստման համար օգտագործվել են ադրբեջանական ԶԼՄ-ների, ոչ կառավարական կազմակերպությունների, ուժային կառույցների հրապարակումները:
Մոնիտորինգի արդյունքներով' 2015 թվականի անցած ժամանակաշրջանում Ադրբեջանի անվտանգության եւ պաշտպանության հատվածում ընդհանուր թվով մահացել է 19 զինծառայող, որոնցից 12-ը մարտական, 7-ը ոչ մարտական կորուստներ են: Անցած ժամանակաշրջանում 5 զինծառայողներ վիրավորվել կամ վնասվածքներ են ստացել: Բոլոր մահացածները եւ վիրավորվածներն Ադրբեջանի պաշտպանության նախարարության զորամիավորումների զինծառայողներ են:
Ինստիտուտի հետազոտությունների համաձայն' անցյալ տարիների համեմատ, ադրբեջանական բանակում մարտական կորուստները կտրուկ աճել են: Միեւնույն ժամանակ, կորուստների ընդհանուր թիվը խիստ աճել է նաեւ 2014 թվականի համապատասխան ժամանակաշրջանի հետ համեմատ: 2014 թ. առաջին եռամսյակում ադրբեջանական բանակի կորուստը կազմել էր 16 զինծառայող, ովքեր մահացել են ոչ մարտական պայմաններում:
Ըստ «Խազարի»' հետազոտությունները ցույց են տալիս, որ մարտական կորուստների թվի աճի պատճառը շփման գծում լարվածության մեծացումն է, իսկ ոչ մարտական կորուստների թվի աճը' զինծառայողների միջեւ կանոնադրական հարաբերություններում ծագած խնդիրները:
«2015 թվականի ապրիլի 2-ին Ադրբեջանի պաշտպանության նախարար Զաքիր Հասանովը հայտարարել էր, որ Ադրբեջանի ԶՈւ-ն առաջնագծում 8 զինծառայող է կորցրել: Սակայն, ՊՆ կողմից հաստատված տեղեկությունների մոնիտորինգը վկայում է, որ առաջնագծում նվազագույնը 10 զինծառայող է զոհվել: Դրան հավելած' ՊՆ-ը վերաբերմունք չի արտահայտել մեկ զոհի վերաբերյալ», -նշել է «Խազարը»:
«Խազար»-ի հետազոտությունների համաձայն, ընթացիկ տարում Ադրբեջանի անվտանգության եւ պաշտպանության ոլորտում մահացած զինծառայողների իրական թիվը դեռեւս հայտնի չէ: ՊՆ-ից բացի մյուս ուժային կառույցներում տեղի ունեցող միջադեպերն ու իրադարձությունները հասարակությունից ամբողջությամբ թաքցվում են:
Ինչու՞ են թաքցվում զինվորների մահերը: Ըստ «Խազար»-ի, զինված ուժերում առկա իրավիաճակը, զինվորների մահերը հանրությունից թաքցնելու պատճառը հանրության հնարավոր հակազդեցության չեզոքացումն է:
Ադրբեջանի անվտանգության եւ պաշտպանության հատվածը շարունակում է հաշվետու չլինել խորհրդարանի եւ հանրության առջեւ: ՊՆ-ին պատկանող տեղեկատվական կառույցները ռազմական ծախսերի, անվտանգության եւ պաշտպանական հատվածում հանցագործությունների, զինվորների մահերի, կոռուպցիայի եւ կաշառակերության հետ կապված որեւէ տեղեկություն չեն հրապարակում: Այստեղ խոսքը ռազմական գաղտնիքի մասին չէ, այլ արդի չափանիշներին համապատասխան հանրության առաջ պարտադիր հաշվետվության, ինչը տեղեկատվական քաղց է ստեղծում հանրության շրջանում:
Բանը հասել է նրան, որ ՊՆ մամուլի ծառայությունը ստիպում է էլեկտրոնային էջերից ջնջել այն սակավաթիվ ԶԼՄ-ների' բանակում տեղի ունեցող մահերի մասին անգամ հատուկենտ տեղեկությունները, որոնք նրանց հասանելի են դառնում իրենց աղբյուրների միջոցով:
«Խազար»-ը գրում է, որ իրենց մոնիտորինգը ցույց է տալիս, որ այդ «ջնջված» տեղեկությունները վերաբերվել են 2015 թվականի առաջին եռամսյակում զինվորների մահերին, այսինքն, ՊՆ-ը չի ցանկանում, որ մամուլում լուսաբանվեն հատկապես ոչ մարտական կորուստները:
«Պետք է նկատի ունենալ, որ Ադրբեջանի պետբյուջեի մոտ 20 տոկոսը կազմում են պաշտպանական ծախսերը, եւ այդ իմաստով ուժային կառույցների հանրության առաջ հաշվետու լինելը պարտադիր է: Սակայն, իրականում ուժային կառույցները, հատկապես, ՊՆ-ը զբաղված են խնդիրները, ապօրինությունները թաքցնելով», -ամփոփել է «Խազար»-ը:
