Թուրքիայի նախագահ Ռեջեփ Թայիփ Էրդողանը, խախտելով սահմանադրությամբ արձանագրված նախագահի անկողմնակալության սկզբունքը, շարունակում է խորհրդարանական ընտրություններին ընդառաջ քարոզչություն իրականացնել' թիրախավորելով հասարակության տարբեր զանգվածների: Ինչպես հաղորդում է «Արմենպրես»-ը' վկայակոչելով թուրքական Hurriyet Daily News-ը, Բինգյոլում տեղի ունեցած ելույթում Էրդողանը ռասիստական հայտարարություններ է հնչեցրել հայերի, լրագրողների և համասեռամոլների հասցեին' մեղադրելով նրանց խորհրդարանական ընտրություններում քրդական Ժողովուրդների դեմոկրատական կուսակցությանն աջակցելու մեջ:
«Նրանց մեծագույն աջակիցը «Դողան» մեդիան է: Հայկական լոբբին, հոմոսեքսուալները և նրանք, ովքեր հավատում են «ալևիզմին առանց Ալիի», խռովության կողմնակիցներ են»,- հայտարարել է Էրդողանը:
Նախընտրական պայքարի շրջանակներում Էրդողանն առաջին անգամը չէ, որ փորձում է սևացնել քրդական կուսակցությանը, որպեսզի վերջինս չկարողանա ընտրություններում հաղթահարել տասը տոկոսի նախընտրական շեմը: Թուրքիայի նախագահը բազմիցս արդեն վիրավորական և ռասիստական հայտարարություններ է արել հայերի հասցեին' մեղադրելով քրդական կուսակցությանն աջակցելու մեջ: Ուրֆայում տեղի ունեցած հանրահավաքի ելույթում անդրադառնալով թուրք-քրդական բախումներին և ակնարկելով ընդդիմությանը' նա հանդես է եկել զավեշտալի հայտարարությամբ' ասելով, թե «որոշ քաղաքական ուժեր Թուրքիան մասնատելու նպատակով համագործակցում են հայկական սփյուռքի հետ»:
