Հաշվի առնելով ամառվա լողաշրջանի բացումը և եղանակային պայմանների հետևանքով գետերի վարարման ու ջրածածկումների վտանգը' ՀՀ ԱԻ նախարարությունը հորդորում է պահպանել անվտանգության կանոնները, ինչպես նաև գետերի, լճերի ու ջրամբարների հարևանությամբ առանց հսկողության չթողնել մանկահասակ երեխաներին ու դեռահասներին:

ԱԻ նախարարության պաշտոնական կայքում նշված է.

«Ջրհեղեղը ցամաքի որոշակի տարածքների ժամանակավոր ջրածածկումն է: Այն կարող է առաջանալ' երկարատև առատ տեղումներից« սառցադաշտերի և ձյան հալոցքի ժամանակ« մեծածավալ և կենտրոնացված ջրի հոսքից ջրամբարների փլուզումներից« հիդրոկայանների պատնեշների ճեղքումից և երկրի մակերես ստորգետնյա ջրերի հանկարծակի ելքից:

Մինչև ջրհեղեղը'
• նախատեսել փրկարար միջոցների պահուստներ (փրկօղակ, փրկաբաճկոն և այլն)
• պատրաստել ավազով լցված պարկեր
• կապիտալ շինարարություն նախաձեռնել միայն համապատասխան պետական մարմինների թույլտվությամբ
• թունավոր և վտանգավոր նյութերը տեղափոխել ավելի ապահով տեղ
• անհրաժեշտության դեպքում կահույքը բարձրացնել ջրի սպասվելիք մակարդակից բարձր
• միշտ պատրաստ պահել աղետի կապոցը
• պահեստավորել խմելու ջրի և սննդի պաշար (մի քանի օրվա համար):

Ջրհեղեղի սպառնալիքի դեպքում'
• անջատել գազը և էլեկտրականությունը
• իմանալ բնակավայրերի ռելիեֆը և ջրհեղեղի սպառնալիքի դեպքում այնտեղից անվտանգ հեռանալու ճանապարհները

• հետևել հիդրոօդերևութաբանական ազդարարման նշաններին
• հետևել տարհանման և ապաստարանի վերաբերյալ տեղեկատվությանն ու կառավարման մարմինների հրահանգներին
• պատրաստի ունենալ լուսային ազդանշանային սարքեր
• բնակավայրից հեռանալ չհասցնելու դեպքում տրանսպորտով կամ ոտքով բարձրանալ բարձրադիր վայրեր (բլուր, լեռ և այլն):

Ջրհեղեղի ժամանակ'
• աղետի կապոցը պահպանել թրջվելուց
• մինչև կառավարման մարմինների համապատասխան հրահանգները մնալ ապաստարաններում
• ծանծաղ տեղերն անցնելիս հագնել ջրակայուն, պինդ կոշիկներ և օգտվել ձեռնափայտից
• տանը գտնվելիս ոչ մի դեպքում չօգտվել կենցաղասպասարկման համակարգերից երկրորդածին աղետներից խուսափելու համար

• օգնության կարիքի դեպքում տալ աղետի ազդանշան (խարույկ, բղավոց, կրակոց, դրոշ, շչակ և այլն):

Չփորձել կտրել-անցնել ջրային հոսքը: 15 սմ խորության ջրի արագ հոսքը վտանգավոր է մարդու համար, իսկ 50 սմ-ը' անանցանելի սովորական մեքենաների համար:

Ջրհեղեղից հետո'
• ստուգել սննդի պիտանելիությունը
• սննդամթերքը լվանալ եռացրած ջրով
• խմելու ջուրն օգտագործել սանիտարական ստուգումից կամ եռացնելուց հետո
• չօգտագործել ջրում հայտնված սննդամթերքը
• օգտվելուց առաջ ստուգել հաղորդակցության համակարգերը, նրանց վնասվածության աստիճանը
• հաղորդակցության համակարգերի վերանորոգումը վստահել մասնագետներին
• չմնալ վթարային կամ վստահություն չներշնչող տանը
• առանց անհրաժեշտության չմտնել ջրածածկ տարածքները:

Ուշադիր հետախուզել կացարանը'
1. հիմքի ամբողջականությունը
2. պատերի, պատուհանների և հատակի վիճակը
3. հաղորդակցության համակարգը
4. թունավոր օձերի հնարավոր առկայությունը»: