ՀՀ գյուղատնտեսության նախարար Իգնատի Առաքելյանն այսօր ընդունել է ՀՀ-ում Նիդերլանդների Թագավորության արտակարգ և լիազոր դեսպան Յոհաննես Դաումային (նստավայրը' Թբիլիսի): Հանդիպման նպատակն էր քննարկել հայ-հոլանդական համատեղ ծրագրերն ու հետագա համագործակցության հեռանկարները:
Բարձր գնահատելով գյուղատնտեսության ոլորտում Հայաստանում առկա ներուժը' դեսպան Յոհաննես Դաուման հայտնել է հոլանդական կողմի պատրաստակամությունն աջակցություն ցուցաբերել այն առավել արդյունավետ իրացնելու գործում: Միևնույն ժամանակ Հայաստանում ագրարային ոլորտի հետագա զարգացման հարցում դեսպանը հնարավոր է համարել Վերակառուցման և զարգացման եվրոպական բանկի (ՎԶԵԲ) ֆինանսական միջոցների ներգրավումը:
Հանդիպմանը դեսպան Դաուման նախարար Իգնատի Առաքելյանին է ներկայացրել առաջարկություններ կարկուտի հետևանքների վերացման մեխանիզմների վերաբերյալ, որոնք նախարարը խոստացել է ուսումնասիրել:
Անդրադառնալով երկկողմ փոխգործակցության առավել հեռանկարային ուղղություններին' կողմերը հատուկ անդրադարձ են կատարել կարտոֆիլագործության զարգացմանը' այդ համատեքստում հատկապես կարևորելով կարտոֆիլի պահեստավորման և վերամշակման նպատակով ներդրումների իրականացումն ու այս ուղղությամբ համատեղ ծրագրերի նախաձեռնումը: Քննարկվել են նաև Հայաստանոմ գյուղատնտեսական տեխնիկայի վերազինմանն առնչվող խնդիրներ: Նախարար Իգնատի Առաքելյանը վստահություն է հայտնել, որ գյուղտեխնիկայի արդիականացումը հիմք կստեղծի ագրարային բնագավառի հետագա զարգացման համար և թույլ կտա ոլորտը դարձնել ավելի շահութաբեր:
Կողմերը մտքեր են փոխանակել նաև գյուղատնտեսական կենդանիների սնուցման, ինչպես նաև երկուստեք հետաքրքրություն ներկայացնող մի շարք այլ հարցերի շուրջ:

ՀՀ գյուղատնտեսության նախարարության տեղեկատվության և
հասարակայնության հետ կապերի բաժին