Վերջին օրերին ղարաբաղա-ադրբեջանական հակամարտ զորքերի շփման գծում արձանագրվել է լարվածության աճ: Արցախի ՊՆ-ի այսօր տարածած հաղորդագրության համաձայն՝ հակառակորդը Դ-44 տիպի հրանոթներից, ականանետերից, նռնականետերից ու տարբեր տրամաչափի հրաձգային զինատեսակներից հրադադարի պահպանաման ռեժիմը խախտել է շուրջ 80 անգամ, որի ընթացքում հայ դիրքապահների ուղղությամբ արձակել է ավելի քան 950 կրակոց:
ՊԲ առաջապահ զորամասերը աչալրջորեն հետևել են առաջնագծում տիրող զարգացումներին և անհրաժեշտ քայլեր ձեռնարկել հակառակորդի նախահարձակ ակտիվությունը ճնշելու համար:
Իսկ հայ-ադրբեջանական սահմանին, ՀՀ ՊՆ մամուլի խոսնակ Արծրուն Հովհաննիսյանի փոխանցմամբ՝ հանգիստ է, կրակոցներ չկան: «Դե, աննշան կրակոցներ միշտ կան, բայց վիճակը հանգիստ է»,- ասաց Հովհաննիսյանը:
ԼՈւՐԵՐ.com-ի հետ զրույցում սահմանապահ Բաղանիս համայնքի ղեկավար Նարեկ Սահակյանն ասաց՝ իրենց մոտ իրավիճակը հանգիստ է, «կրակոցներ, փառք աստծո, այս պահին չկան»:
«Հունվարի 26-ից այս կողմ հայ-ադրբեջանական սահմանի Բաղանիսի հատվածում հրադադրի ռեժիմը հիմնականում պահպանվում է՝ հաշվի չառնելով մեկ-երկու կրակոցը, որոնք լինում են միջդիրքային: Այս ընթացքում գյուղի ուղղությամբ կրակոցներ չեն եղել»,-նշեց Նարեկ Սահակյանը՝ շեշտելով՝ իրենք իրենց զգոնությունն, այնուամենայնիվ, չեն կորցնում. «միշտ կազմ ու պատրաստ ենք, ինչպես վայել է սահմանապահ բաղանիսցուն»:
Սահմանապահ Չինարի համայնքի ղեկավար Սամվել Սաղոյանը մեզ փոխանցեց, որ իրենց մոտ ևս հանգիստ է, կրակոցներ չեն եղել. «Հարաբերական հանգիստ է»:
Ի դեպ՝ այսօր ադրբեջանական ագիտպրոպը հանդես է եկել հերթական ապատեղեկատվությամբ, համաձայն որի, իբր, հայկական կողմը ձեռնարկել է դիվերսիոն ներթափանցման փորձ, իսկ իրենց ուժերը ժամանակին կանխել են դա: Արցախի ՊՆ-ն հերքել է այդ ապատեղկատվությունը՝ փաստելով, որ Ադրբեջանի ՊՆ-ն վերջնականապես կորցնում է իրականությունը սթափ գնահատելու ընդունակությունը:
Փետրվարի 8-ին, ժամը 12:00-ի սահմաններում, հակառակորդի կողմից հրադադարի ռեժիմի խախտման արդյունքում գլխի ծանր վիրավորում է ստացել ՊԲ ժամկետային զինծառայող, 1988թ. ծնված Կորյուն Կիրակոսյանը, ով գտնվում է Մուրացանի զինվորական հոսպիտալում և վիճակը ծայրահեղ ծանր է:
Իսկ ՊԲ հյուսիսային ուղղությամբ տեղակայված զորամասերից մեկի պահպանության տեղամասում հակառակորդի կողմից հրադադարի ռեժիմի խախտման արդյունքում մահացու վիրավորում է ստացել ՊԲ պայմանագրային զինծառայող, 1979թ. ծնված Գեղամ Մանուկյանը: Վերջինս Մարտակերտից էր: 20 տարի ծառայել է Զինված ուժերում:
Գեղամ Մանուկյանը շփման գծի վտանգավորության բարձր աստիճան ունեցող հատվածներից մեկում մարտական բարդ խնդիր է լուծել. հակադիվերսիոն անվտանգության բարձրացմանն ուղղված կարևոր առաքելություն:
Կինոռեժիսոր Արշակ Զաքարյանի փոխանցմամբ՝ հայկական զինված ուժերը հակառակորդի նկատմամբ պատժիչ գործողություններ են իրականացրել: Զաքարյանը չի նշում, թե քանի զոհ է տվել հակառակորդը, սակայն վստահեցնում է՝ «մերոնք լավ էլ պատժում են»:
Քրիստինա Աղալարյան
