Այսօր՝ մարտի 21-ին, «Ծառուկյան» դաշինքի առաջնորդ Գագիկ Ծառուկյանը խորհրդարանական ընտրություններին ընդառաջ իրականացվող քարոզարշավի շրջանակներում հանդիպեց Սյունիքի մարզի Մեղրի քաղաքի բնակիչների հետ։
ԼՈւՐԵՐ.com-ի թղթակցի փոխանցմամբ՝ նախքան ելույթը՝ Ծառուկյանը հարգանքի տուրք մատուցեց և ծաղկեպսակ դրեց Հայրենական Մեծ պատերազմում զոհված մարտիկների հիշատակը հավերժացնող հուշաքարի մոտ։
Ելույթի ընթացքում «Ծառուկյան» դաշինքի առաջնորդն ընդգծեց մեր երկրի առջև ծառացած խնդիրները, նշեց, որ ինքը լավատեղյակ է և տիրապետում է լուծման ձևերին՝ հավելելով, որ դրա համար իրեն անհրաժեշտ է վստահության քվե տալ նախորդ տարիների համեմատ ավելի մեծ թվով՝ 50+1%։
«Մարդիկ կան՝ այնպիսի ծրագրեր են ներկայացրել, ոնց որ Շվեյցարիայում լինեն, դրա համար պետք է ընտրություն կատարելիս նայեք արված գործին։ Իմացե՛ք, սխալ ընտրություն կատարեք՝ 5 տարի ավելի վատ է լինելու»,-ասաց Ծառուկյանը։
Ի դեպ, կարևոր մի նախաձեռնություն մասին Ծառուկյանը հայտարարեց հենց Մեղրիում' անհաժեշտ է «Գերշահույթի մասին» օրենք ընդունել, որով շահույթի մի մասը պարտադիր կուղղվի պետական բյուջե:
«Եթե քայլ չկատարվի, եթե մեր 15 կետերը չիրագործվեն, ապա ոչ մի խնդիր լուծում չի ստանա ու ոչինչ չի փոխվի առաջիկա տարիներին էլ»,-հավելեց նա:
Գագիկ Ծառուկյանը, դիմելով մեղրեցիներին, շեշտեց, որ հույսով, հավատով, «դուխով» գնան ընտրության, և ամեն ինչ լավ է լինելու։
