ՀՀ սփյուռքի նախարար Հրանուշ Հակոբյանը հունիսի 15-ին ընդունեց ՄԱԿ-ի Փախստականների հարցերով գերագույն հանձնակատարի հայաստանյան գրասենյակի ներկայացուցիչ Քրիստոֆ Բիրվիրթի ղեկավարած պատվիրակությունը, որի կազմում էին իրավաբանական բաժնի ղեկավար Իննա Բորիսովիչը և արտաքին կապերի համակարգող Անահիտ Հայրապետյանը: Այս մասին տեղեկացրին ՀՀ սփյուռքի նախարարության մամուլի և հասարակայնության հետ կապերի վարչությունից:
Նախարար Հրանուշ Հակոբյանը, ողջունելով հյուրերին՝ կարևորեց սիրիահայերի հիմնախնդիրների լուծման ուղղությամբ կազմակերպության իրականացրած աջակցության ծրագրերը, ինչպես նաև նախարարաության հետ սերտ համագործակցությունը:
Քննարկվեց «Մերձավոր Արևելքում պատերազմի հետևանքով տեղահանված և Հայաստան տեղափոխված անձանց ազգային ինտեգրման ռազմավարության» նախագիծը:
ՄԱԿ-ի Փախստականների հարցերով գերագույն հանձնակատարի հայաստանյան գրասենյակի ներկայացուցիչը հանգամանորեն ներկայացրեց ռազմավարության վերաբերյալ իր կարծիքը, հարցադրումները, առաջարկությունները:
Նա կարևորեց միջազգային ասպարեզներում սիրիահայերի խնդիրների պատշաճ ներկայացումը՝ հանրության ուշադրությունը դեպի Հայաստան ուղղելու համար:
