ՀՀ առողջապահության նախարար Լևոն Ալթունյանն ընդունել է ԳԱՎԻ (Պատվաստումների և պատվաստանյութերի գլոբալ դաշինք) աջակցության երկրների ավագ մենեջեր Ջամիլյա Շերովային և ԳԱՎԻ մունականխարգելման ֆինանսավորման և կայունության ավագ մենեջեր Ջոհանա Ուիսնևսկային։ Ինչպես տեղեկացրին ՀՀ առողջապահության նախարարությունից, նրանք նախարարին համառոտ ներկայացրել են Հայաստան այցելության նպատակը, այն է' երկրում պատասխանատու կառույցների հետ քննարկել մարդու պապիլոմավիրուսային պատվաստումների ներդրման նախապատրաստական միջոցառումները և հասկանալ ԳԱՎԻ աջակցության ավարտի հետ կապված երկրի իրավիճակը, ինչպես նաև ԳԱՎԻ–ի կողմից աջակցության հնարավոր երկարաձգման անհրաժեշտությունը:
Ամփոփելով այցի ընթացքում ունեցած հանդիպումների և քննարկումների արդյունքները, նրանք ընգծել են, որ Հայաստանում Իմունականխարգելման ազգային ծրագրի ձեռքբերումներն երկրում առկա քաղաքական բարձր կամքի շնորհիվ է։ Նրանք վստահեցրել են, որ իրենց համար շատ կարևոր է դրանց պահպանումը և կայունությունը ԳԱՎԻ–ի աջակցության ավարտից հետո:
Լևոն Ալթունյանը նշել է, որ ներկայումս մարդու պապիլոմավիրուսային պատվաստումների ներդրումը հասարակության շրջանում որոշակի մտահոգությունների ալիք է բարձրացրել: Առողջապահության նախարարությունը լրացուցիչ կուսումնասիրի երկրների փորձը և ակտիվ հանրային իրազեկում կիրականացնի պատվաստումների ծախսարդյունավետության, օգուտների և ռիսկերի վերաբերյալ: Այս համատեքստում կարևորվել է հետագա համագործակցությունը գործընկերների հետ:
