Ըստ հրապարակախոս Մարինե Պետրոսյանի՝ այս ընտրությունների առանձնահատկությունն այն է, որ շատ մեծ դեր են խաղում սոցիալական ցանցերը, մասնավորապես Ֆեյսբուքը, որի հնարավորությունը չկար 2008-ին: Ֆեյսբուքը հնարավորություն է տալիս քննարկել, քննադատել, և այս առումով շարժումը տարբերվում է 2008-ից: «Եթե այնպես լինի, որ շարժումն արագ գնա դեպի մարում /չեմ ուզում այդպես լինի/, կարծում եմ այլ շարունակություն կունենա, անհետևանք չի մնա», ասել է հրապարակախոսը:
Հիմա հասարակությունը քաղաքականապես շատ ավելի հասուն է, սակայն 2008-ի շարժումը քաղաքականապես շատ ավելի հստակ էր, թեև մի շերտ կար, որ Լևոն Տեր-Պետրոսյանի ոճը չէր ընդունում, չէր մասնակցում շարժմանը: Իշխանության համար ակնհայտ դարձավ, որ հասարակությունն իրեն չի ընդունում, չի ընդունում այս իրավիճակը:
Մարինե Պետրոսյանի դիտարկմամբ՝ Լևոն Տեր-Պետրոսյանը շատ ավելի ուժեղ քաղաքական գործիչ էր, շատ ընդգծված էր, շատերը թեև գոռում էին Լևոն, բայց շատերը Լևոնի համար չէին գալիս, փոփոխություն էին ակնկալում, այսօր էլ շատերն ասում են Րաֆֆիի համար չեն եկել, եկել են հանուն փոփոխության:
Սակայն, ըստ նրա, Րաֆֆի Հովհաննիսյանը խուսափում է քաղաքական ձևակերպումներից, համակարգային հարց դնելուց, մինչդեռ 2008-ին կար ձևակերպում՝ ավազակապետություն:
Կինոռեժիսոր Էդգար Բաղդասարյանի կարծիքով՝ շարժումը մարելու է՝ չնայած որոշ բաներ թույլ կտան առողջացնել պրոցեսը: Կարևոր է՝ հինգ տարի հետո նույն սցենարը չկրկնվի:
«Այսօր մտավորականության տեսակն է խայտառակվում, մեղադրանքներ են հնչում՝ ով ինչ է վերցրել, ով ում է պարտք. պետք է սա կանգնեցնել, չափ կա, որը չի կարելի անցնել: Մի լավ բան կա՝ պետք է երբևէ չվերցնես, եթե մի բան վերցնում ես, պետք է վերադարձնես. ես չեմ ուզում դրա մեջ ներգրավվել», ասել է ռեժիսորը՝ նկատի ունենալով վերջին օրերին Շուշան Պետրոսյանի, Ռուբեն Հախվերդյանի շուրջ ծավալված աղմուկը:
Մարինե Պետրոսյանի կարծիքով, Շուշան Պետրոսյանը սխալ արեց, որ մտավ քաղաքականություն, քանի որ պրոցեսներից ոչինչ չի հասկանում, իզուր կրակ է վերցնում իր վրա, փորձում է պաշտպանել ՀՀԿ-ին, սակայն հակառակն է ստացվում. «Տխուր է այն, ինչ կատարվում է Շուշանի հետ: Ես նրան խորհուրդ կտայի քաղաքականությունից հեռանալ»,- ասել է Մարինե Պետրոսյանը: