ՀՀ կրթության և գիտության նախարարության լեզվի պետական տեսչությունը կոմիտե դառնալուց հետո նոր գործառույթներ և հնգամյա ծրագիր կունենա:
Այս մասին ասաց ՀՀ ԿԳՆ լեզվի պետական տեսչության պետ Սերգո Երիցյանը:
Նա նշեց, որ այս փուլում շրջանառության մեջ է կառավարման մարմինների համակարգի մասին օրենսդրական նախագիծը, որտեղ ի դեմս այն կոմիտեների, որոնք գտնվում են նախարարությունների կազմում, հստակ նշված է նաև Լեզվի տեսչությունը:
«Մենք շատ երկար ժամանակ լեզվի կոմիտեի մասին որոշման նախագիծ ենք ներկայացրել, բոլոր գերատեսչությունների կողմից դրական կարծիքներ կան, և այս փաթեթը ներկայացված է Կառավարությանը, և այնտեղ առաջիկայում կքննարկվի»,-ընդգծեց Երիցյանը:
Նա նշեց, որ նախագծի ընդունման դեպքում տեսչությունը կամ վերակազմակերպվելու է պետական կոմիտեի, կամ ստեղծվելու է պարզապես պետական կոմիտե:
«Կառավարությունում նախատեսվող նիստում այս հարցի շուրջ քննարկումներից հետո մենք կունենանք հարցի վերջնական լուծում: Մենք այս ընթացքում հանգիստ չենք նստում, աշխատում ենք, շարունակում ենք իրականացնել լեզվի պետական տեսչության գործառույթները: Վերջին 6-7 ամսվա ընթացքում հրապարակային գրվածքի հետ կապված ավելի քան 1000 դիտարկում ենք արել ամբողջ հանրապետությունում: Հանրային գրվածքի դրսևորումների հնարավոր խախտումների արձանագրում ենք իրականացրել»,-ասաց Լեզվի պետական տեսչության պետը:
Երիցյանն ընդգծեց, որ այս ժամանակահատվածում Կառավարության որոշմամբ վարույթների ու ստուգումների վերաբերյալ տեսչական մարմինների աշխատանքը կասեցված է:
Նրա խոսքով՝ օրենսդրական փոփոխություններ են պետք, որ ոչ միայն պատժիչ մեխանիզմներ լինեն, այլ նաև կիրառվեն զգուշացումներ:
Սերգո Երիցյանը շեշտեց, որ ցանկացած ապրանքանիշ կարող է լինել, սակայն կողքին հայերեն տարբերակով պետք է գրված լինի տվյալ կազմակերպության գործունեության տեսակը՝ ռեստորան, սուպերմարկետ, հագուստի խանութ և այլն:
