ՀՀ արտակարգ իրավիճակների նախարարության «911» ծառայությունը մայիսի 8-ին, ժամը 14:35-ին տեղեկություն է ստացել, որ Երևան քաղաքի Էրեբունու փողոցի թիվ 8 հասցեի մոտակայքում տեղի է ունեցել ՃՏՊ, առկա է գազի արտահոսք. անհրաժեշտ է փրկարարների օգնությունը:

Դեպքի վայր է մեկնել ՀՀ ԱԻՆ փրկարար ծառայության հրշեջ-փրկարարական ջոկատի մեկ մարտական հաշվարկ:

Ինչպես տեղեկացրին նախարարության տեղեկատվության և հասարակայնության հետ կապերի վարչությունից, պարզվել է, որ բախվել են «Opel Astra G» մակնիշի (վարորդը՝ Հ. Գ.), «Mercedes E350» մակնիշի (վարորդը՝ Հ. Մ.) և «BYD» մակնիշի (վարորդը՝ Հ. Պ.) ավտոմեքենաները. Հ. Պ.-ն տեղում մահացել է:

Մինչ փրկարարների՝ կանչի վայր հասնելը, «Mercedes E350» մակնիշի ավտոմեքենայի վարորդը՝ Հ. Մ.-ն և ուղևորները՝ Ա. Մ.-ն (ծնված 1986 թ.), Ն. Ս.-ն (ծնված 1986 թ.) և Ս. Ք.-ն (ծնված 1996 թ.) հոսպիտալացվել են Երևան քաղաքի «Էրեբունի» բժշկական կենտրոն: Բժիշկները տուժածների առողջական վիճակը գնահատել են բավարար:

Փրկարարները հոսանքազրկել են «BYD» և «Mercedes E350» մակնիշի ավտոմեքենաները, դադարեցրել «BYD» մակնիշի ավտոմեքենայի գազի արտահոսքը, սահմանազատել տարածքը և իրականացրել վառելիքաքսուքային նյութերից ավտոճանապարհի լվացման աշխատանքներ: