Հոկտեմբերի 11-ին՝ ժամը 19-ի սահմաններում, «Վանաձորի բժշկական կենտրոն»-ից հաղորդում է ստացվել, որ իրենց մոտ «ձախ սրունքի և աջ ազդրի հրազենային վնասվածք» ախտորոշմամբ բուժօգնության են ընդունվել Գ. Նավոյանը, «աջ ուսագոտու շրջանի հրազենային միջանցիկ վնասվածք, պարանոցի աջ կեսի հրազենային վնասվածք» ախտորոշմամբ` Գ.Դավթյանը և «ձախ ոտնաթաթի հրազենային վնասվածք» ախտորոշմամբ` Ա. Սեդրակյանը:
ԼՈւՐԵՐ.com-ի թղթակցի հետ զրույցում Քննչական կոմիտեից տեղեկացրին՝ դեպքի առթիվ Լոռու մարզային քննչական վարչությունում հարուցվել է քրեկան գործ Քրեական օրենսգրքի 34-104-րդ հոդվածի 2-րդ մասի 1-ին ու 6-րդ կետերի և 235-րդ հոդվածի 1-ին մասի հատկանիշներով, այն է՝ սպանության փորձ կատարելը, ապօրինի զենք և ռազմամթերք ձեռք բերելն ու պահելը:
«Նախաքննությամբ պարզվել է, որ նշված անձինք մարմնական վնասվածքները ստացել են նույն միջադեպի ժամանակ, երբ ինքնությունը դեռևս չպարզված անձը, հոկտեմբերի 11-ին՝ ժամը 18:00-ի սահմաններում, Վանաձոր քաղաքի ռեստորանային համալիրներից մեկի դիմաց՝ իր մոտ պահած հրազենից, ապօրինաբար կյանքից զրկելու դիտավորությամբ, կրակոցներ է արձակել: Կատարված մեծածավալ քննչական և դատավարական գործողություններով պարզվել է, որ վերոհիշյալ կրակոցները կատարվել են սև «ՎԱԶ-21074» մակնիշի, 35 PM 312 հաշվառման համարանիշի ավտոմեքենայից, որով և ենթադրյալ հանցանք կատարած անձը դեպքի վայրից դիմել է փախուստի: Նույն օրը՝ ժամը 18:05-ին, ՀՀ ԱԻՆ Լոռու մարզային փրկարարական վարչությունից ստացված հաղորդման կապակցությամբ նախապատրաստված նյութերով տվյալներ են ստացվել Վանաձոր քաղաքի Սանկտ-Պետերբուրգ փողոցի 15/1 հասցեի մոտ հայտնաբերվել է ՎԱԶ-21074 մակնիշի, 35 PM 312 հաշվառման համարանիշի ավտոմեքենան՝ այրվող վիճակում: Կատարված դեպքի վայրի զննությամբ ավտոմեքենայում հայտնաբերվել և վերցվել են 30 պարկուճ»,- ասացին Քննչական կոմիտեից:
Նշենք, որ դեպքի առթիվ 2018 թվականի հոկտեմբերի 11-ին Քրեական օրենսգրքի 185-րդ հոդվածի 2-րդ մասի 1-ին կետի հատկանիշներով հարուցվել է քրեական գործը:
«Նկատի ունենալով, որ փաստական հանգամանքներով պայմանավորված՝ առկա է միաժամանակյա բազմակողմանի, լրիվ և օբյեկտիվ քննություն ապահովելու անհրաժեշտություն, հիշյալ քրեական գործերը միացվել են մեկ վարույթում: Դեպքի հանգամանքները պարզելու համար իրականացվել են անհետաձգելի քննչական և դատավարական այլ գործողություններ, հարցաքննվել են մոտ երկու տասնյակ անձինք: Բուժօգնության դիմած քաղաքացիները ճանաչվել են տուժող: Քրեական գործով մի շարք հանգամանքներ պարզելու նպատակով նշանակվել են դատաբժշկական և դատաձգաբանական փորձաքննություններ: Ձեռնարկվում են անհետաձգելի միջոցառումներ, առերևույթ հանցագործություն կատարած անձին հայտնաբերելու ուղղությամբ»,- փոխանցեցին Քննչական կոմիտեից՝ ավելացնելով, որ նախաքննությունը շարունակվում է:
