ՀՀ արտակարգ իրավիճակների նախարարի պաշտոնակատար Ֆելիքս Ցոլակյանը դեկտեմբերի 22-ին աշխատանքային այցով Կոտայքի մարզում էր: Ֆելիքս Ցոլակյանն այցելել է Լուսակերտի ուսումնական կենտրոն, որտեղ ծանոթացել է փրկարար ծառայության քաղաքացիական պաշտպանության վարչության քաղպաշտպանության ուժերի հավաքական կենտրոնի գործունեությանը:
Այս մասին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից՝ հավելելով. «Շրջայց կատարելով ուսումնական կենտրոնի տարածքում՝ ԱԻ նախարարի պաշտոնակատարը ծանոթացավ կենտրոնի շինությունների գույքային ապահովվածությանն ու տեխնիկական հագեցվածությանը:
Անդրադառնալով փրկարարների վերապատրաստման հարցին՝ նախարարի պաշտոնակատար Ֆելիքս Ցոլակյանը հատկապես կարևորեց սակրավորների պրոֆեսոնալիզմը, նշելով. «Հրդեհի կամ այլ արտակարգ դեպքի ժամանակ փրկարարի առջև դրված խնդիրն ուրիշ է, իսկ սակրավորի խնդիրը լրիվ այլ է: Այստեղ շատ ավելի լուրջ ուսուցում է անհրաժեշտ, քանի որ սակրավորը մեկ անգամ է սխալվում, և այդ մեկ անգամը չպետք է լինի»:
ԱԻ նախարարի պաշտոնակատարի հաջորդ կանգառը Հայ-ռուսական մարդասիրական աջակցության կենտրում էր, որտեղ Ֆելիքս Ցոլակյանը ծանոթացավ մարդասիրական կենտրոնի, դրա տարածքում տեղակայված ԱԻՆ Հատուկ նշանակության փրկարարական աշխատանքների իրականացման կենտրոնի (ՀՆՓԱԻԿ) և ՀՌԱԿ Ճգնաժամային կառավարման կենտրոնի գործունեությանը: Շրջայցի ընթացքում նախարարի պաշտոնակատարը ծանոթացավ նաև մարդասիրական կենտրոնի պահեստներին, որոնցում տեղակայված են ինչպես ՀՆՓԱԻԿ, այնպես էլ ՀՀ ԱԻՆ միջազգային որոնողափրկարարական խորհրդատվական խմբի փրկարարական գույքը, սարքավորումները և հատուկ նշանակության փրկարարական մեքենաները:
Անդրադառնալով հատուկ նշանակության փրկարարական մեքենաների տեղակայման վայրերին՝ Ֆելիքս Ցոլակյանը նշեց. «Արտակարգ իրավիճակների արագ արձագանքման խմբերը պետք է պատրաստ լինեն լուրջ դեպքերի համար: Մենք պետք է կարողանանք հասնել նրան, որ մարզերում գրանցվող վթարները և այլ արտակարգ դեպքերը սպասարկվեն տեղի ուժերով, իսկ հատուկ նշանակության փրկարական մեքենաները անհրաժեշտ է պահել լուրջ դեպքերի համար»:
ՀՆՓԱԻ կենտրոնն ունի նաև հետախույզ-կինոլոգիական ջոկատ՝ բաղկացած 8 հոգանոց անձնակազմից: Նրանք վարժեցնում են հատուկ փրկարարական միջոցառումների համար նախատեսված 8 շների՝ 6-ը հովվաշուն, 2-ը՝ լաբրադոր ցեղատեսակի: Նախարարի պաշտոնակատարը ծանոթացավ նաև հետախույզ-կինոլոգների աշխատանքներին:
Ֆելիքս Ցոլակյանը շրջեց նաև կենտրոնի տարածքում, եղավ քիմիական պաշտպանության և սակրավորների վերապատրաստման լսարաններում: Այստեղ նախարարի պաշտոնակատարին ներկայացվեց դասընթացների համար նախատեսված գերժամանակակից և արդիական տեխնիկական հագեցվածությունը:
Նախարարի պաշտոնակատար Ֆելիքս Ցոլակյանին ներկայացվեցին նաև ճգնաժամային կառավարման կենտրոնի գործառույթներն ու հնարավորությունները: Աշխատանքային այցի ավարտին հայ-ռուսական մարդասիրական արձագանքման կենտրոնի ռուսական կողմի հետ քննարկվեցին և նախանշվեցին ապագայում իրագործվելիք ծրագրերը և միջոցառումները»:
