2019 թ. հունվարի 1-ից մինչև ապրիլի 30-ն ընկած ժամանակահատվածում Հայաստանի Հանրապետությունում արձանագրվել է դեղորայքային թունավորման 211 (2018թ. նույն ժամանակահատվածում՝ 207) դեպք, որից Երևան քաղաքում՝ 108 (2018թ. նույն ժամանակահատվածում՝ 93), մարզերում՝ 103 (2018թ. նույն ժամանակահատվածում՝ 114)։ Մահվան ելքով դեպքեր չեն արձանագրվել: Այդ մասին հայտնում է ԱՆ Հիվանդությունների վերահսկման և կանխարգելման ազգային կենտրոնը:

Ընթացիկ տարում Երևան քաղաքում և մի շարք մարզերում դեղորայքային թունավորումների հիվանդացության ցուցանիշները գերազանցում են միջին հանրապետական ցուցանիշը, մասնավորապես Երևան քաղաքում՝ 1.4 անգամ, Արարատի մարզում՝ 1.5 անգամ, Կոտայքի մարզում՝ 1.2 անգամ:

Թունավորման դեպքերի հիմնական մասն արձանագրվել է ինքնաբուժման (36%), ծնողի անուշադրության (37.9%) և ինքնասպանության փորձի (9.9%) պատճառով: Դեպքերի մեծ մասն արձանագրվել է երեխաների շրջանում (53.6%)։

2019 թվականին դեղորայքային թունավորումների դեպքերը 2018 թ. նույն ժամանակահատվածի համեմատ աճել են կանանց շրջանում (59.2%):

Դեղորայքային թունավորումներից առավել հաճախ հանդիպում են ցավազրկող և հոգեմետ դեղորայքով թունավորումները: Հոգեմետ դեղորայքով թունավորումների պատճառների ուսումնասիրությունը ցույց է տալիս, որ հոգեկան հիվանդներին բժշկի կողմից նշանակված դեղորայքի ընդունումը ոչ միշտ է հսկվում նրանց հարազատների կողմից, թունավորվածների մի մասն էլ հոգեմետ դեղորայք օգտագործում է ինքնաբուժման և ինքնասպանության նպատակով: Ցավազրկող դեղորայքից թունավորվելու հիմնական պատճառն ինքնաբուժումն է: Շատ են նաև կալիումի պերմանգանատից և կարբամազեպինից թունավորման դեպքերը:

Դեղորայքային թունավորումներից և հետագա բարդություններից խուսափելու նպատակով ԱՆ հիվանդությունների վերահսկման և կանխարգելման ազգային կենտրոնը ևս մեկ անգամ հորդորում է.

*դեղորայք ընդունելիս խորհրդակցել բժշկի հետ,

*ինքնուրույն չփոփոխել բժշկի նշանակած դեղորայքի չափաբաժինները և հաճախականությունը,

*մանրամասն ծանոթանալ առանց դեղատոմսի ձեռք բերված դեղորայքի օգտագործման հրահանգներին,

*ալկոհոլը չզուգակցել դեղորայքի ընդունման հետ,

*առանց բժշկի խորհրդատվության դեղամիջոցները չզուգակցել,

*հետևել դեղորայքի պահպանման կանոններին:

Աղբյուրը՝ news.am