«Մեկը հարցնի՝ Քաջ Նազարի բախտով եկել, դարձել ես Կոտայքի մարզպետ, ի՞նչ ես ուզում, չեմ հասկանում։ Մարդն էդքան չկամ չպետք է լինի»,- այս մասին ԼՈՒՐԵՐ․com—ի հետ զրույցում ասաց Նոր Գեղիի նախկին համայնքապետ Ֆրոնտիկ Թևոսյանը՝նշելով, որ Կոտայքի մարզպետի քայլից հետո տեղը չի գտնում։
«Մեր գյոզալ մարզպետը, կոլոտ կամանդիրը, որ ոչ մի առավելություն չունի, մարզի հազարավոր խնդիրները թողած, ընկել է փողոցի անունների հետևից։ Եկած օրվանից ինձ ասում էր դիմում գրի, ես էլ դիմումս գրել դուրս եմ եկել։ Բերեց իր համագյուղացի, սանիկ Վարդան Պապյանին դրեց համայնքի ղեկավար։ Դրանով չբավարարվեց, դեկտեմբեր ամսից կպել է՝ պիտի չեղյալ համարվի ավագանու որոշումը, որով փողոցներից մեկը անվանակոչվել է իմ անունով։ 32 տարի աշխատել եմ, եկեղեցի եմ կառուցել գյուղում, ահագին գործեր ենք արել»,- ասաց նա։
Հարցին՝ գտնում է, որ այդքան վաստակ ունի, որ իր անունով փողոց անվանակոչվի, նախկին համայնքապետը նշեց․ «Ժողովուրդն է որոշել, դրել են ավագանու նիստի քննարկմանը, և որոշումն ընդունվել է։ Մի քանի փողոցներ չեն կոչվում իմ անունով, միայն կենտրոնական փողոցն է։ Ժողովուրդն ասեց՝ այս փողոցում ապրում ես, թող դա էլ կոչվի քո անունով, ես էլ ասի՝ ուզում եք կոչեք։ Կարծում եմ՝ դատարանը ճիշտ որոշում կկայացնի, որ ավագանին իրավունք ունի անվանակոչություններ կատարելու։ Հանրապետությունում 40 նման անվանակոչության դեպքեր կան, որ մարդու կենդանության օրոք նրա անունով անվանակոչություն են արել»,- նշեց Թևոսյանը։
Նշենք, որ Ֆրոնտիկ Թևոսյանը Նոր Գեղի համայնքի ղեկավարն է եղել 1985 թվականից և պաշտոնից ազատման դիմում է գրել Հայաստանում տեղի ունեցած իշխանափոխությունից հետո, ինչպես ինքն է նշում՝ Կոտայքի մարզպետի հորդորով:
