Ֆրանսիայի իշխանությունները 25 միլիոն եվրոյով տուգանել են Apple ընկերությանն այն բանի համար, որ ընկերությունն օգտատերերին չի տեղեկացրել, որ iOS ծրագրային ապահովման նորացումը կարող է հանգեցնել iPhone 6-ի, SE-ի և 7-ի աշխատանքի դանդաղեցման՝ տեղեկացնում է RIA Novosti-ն։

Ֆրանսիացի քննիչները 2018 թվականի հունվարի 5-ին հետաքննություն են սկսել Apple-ի նկատմամբ այն բանի կապակցությամբ, որ օգտատերերին չեն հայտնել, որ 2017 թվականին թողարկված ծրագրային ապահովման նորացումների պատճառով նրանց սմարթֆոնները կարող են ավելի դանդաղ աշխատել, առանձնապես հնացած կուտակիչներով iPhone-ները:

Ծրագրային ապահովման նախորդ տարբերակին վերադառնալու հնարավորության բացակայության պատճառով շատ օգտատերեր ստիպված են եղել փոխել սարքի մարտկոցը կամ էլ գնել նոր հեռախոս:

«Մրցակցության, սպառման և տնտեսական հանցագործությունների դեմ պայքարի հարցերի գլխավոր վարչության հետաքննության արդյունքներով և Փարիզի դատախազի հետ համաձայնությամբ Apple-ի խումբը համաձայնել է 25 միլիոն եվրո տուգանք վճարել գործարքի շրջանակում»,- նշված է վարչության կայքում։