Ես ձեզնից ավելի շատ եմ շահագրգռված շփվել լրատվամիջոցների հետ, որովհետև ես ոչ մի բան չունեմ թաքցնելու։ Այս մասին այսօր լրագրողների հետ զրույցում ասաց ՀՀ 3-րդ նախագահ Սերժ Սարգսյանն, ով գտնվում է Ազգային ժողովում՝ մասնակցելու ապրիլյան քննիչ հանձնաժողովի նիստին։ «Եկել է այն ժամանակը, որ ես պատրաստ եմ պատասխանելու բոլոր հարցերին։ Ես դիմել եմ հանձնաժողովին իմ մասնակցությամբ նիստն անցկացնել արտակարգ դրության ավարտից հետո, բայց հանձնաժողովը նպատակահարմար համարեց նիստն անցկացնել ապրիլի 16-ին, և ինչպես հայտնի է՝ արտակարգ դրությունն էլ երկարացվեց։ Ես չեմ կարող ոտքի վրա տալ ձեր հարցերի պատասխանները, ուստի ես ձեզ խոստանում եմ արտակարգ դրության ավարտից հետո անմիջապես հետո հրավիրել բոլոր լրատվամիջոցներին և միայն ապրիլյան իրադարձությունների հետ կապված պատասխանել ձեր հարցերին»։ Սերժ Սարգսյանը նշեց, որ այսօր իր գրասենյակը կտարածի հայտարարություն։