ՀՀ տարբեր հատվածներում՝ Արմավիրում, Գյումրիում, Երևանում վնասվել են «Յուքոմ» ընկերության օպտիկական մալուխները: Այս մասին ԼՈՒՐԵՐ.com-ի հետ զրույցում ասացին «Յուքոմ»-ի մամուլի ծառայությունից: «Իրավապահ մարմինները զբաղվում են դրանով, մենք ունենք որոշակի տեղեկատվություն, որի մասին պաշտոնապես հաղորդագրություն կտարածենք աշխատանքային օրերի ընթացքում, երբ նաև կունենանք տեղեկությունը տրամադրելու թույլտվությունը՝ նախաքննությանը չխոչընդոտելու նկատառումներից ելնելով, կհրապարակենք, թե հեղինակներն ովքեր են և ինչ նպատակներով»,- հայտնեցին «Յուքոմ»-ից: Ամսվա սկզբին ընկերությունը ևս հայտարարություն էր տարածել օպտիկական մալուխները վնասելու հետ կապված, սակայն երևույթը շարունակվել էր նաև գրանցված դեպքից հետո: Թեև խնդրով զբաղվում են իրավապահները, սակայն դեռևս բացահայտումներ չկան։ Քիչ առաջ «Փաստինֆո»-ն տեղեկություն տարածեց, որ օրերս «Յուքոմ»-ի գլխավոր տնօրեն Արա Խաչատրյանը հրավիրվել է 6-րդ վարչություն, սակայն հափշտակությունների թեման չի քննարկվել։ Այն առավելապես ուղղված է եղել նորանշանակ տնօրենին վախեցնելուն, թե նրա նշանակումն ապօրինի է։