Երևանը անհրաժեշտության դեպքում պատրաստ է դիմելու Մոսկվային ռուսական զենքի նոր մատակարարումների համար, բայց մինչ այժմ այս մասին խոսք չկա, ասել է Ռուսաստանում ՀՀ դեսպան Վարդան Տողանյանը: «Առայժմ խոսք չկա Հայաստանի կողմից արտաքին ռազմական օգնությանը դիմելու մասին», - նշել է դեսպանը: Միևնույն ժամանակ, նա շեշտել է, որ Երևանն ու Մոսկվան դաշնակիցներ են՝ համապատասխան պարտավորություններով: «Մեր ռազմատեխնիկական համագործակցությունը զարգանում է, զենքի մատակարարման մասին համաձայնագրերի իրագործումը ընթանում է բնականոն հունով: Այսօր իրավիճակը փոխվում է, մենք այժմ ունենք երրորդ կողմ՝ Թուրքիան: Անհրաժեշտության դեպքում, իհարկե, մենք կանդրադառնանք և կլուծենք զենքի լրացուցիչ մատակարարումների վերաբերյալ խնդիրները առաջին հերթին Ռուսաստանի հետ», - ասել է Տողանյանը: