Հայաստանի արտգործնախարար Էդվարդ Նալբանդյանը հրավեր չի ստացել մասնակցելու Մոսկվայի Միջազգային հարաբերությունների պետական ինստիտուտի (ՄԳԻՄՕ) շրջանավարտների հանդիպմանը, ո կայանալու է Բաքվում, ապրիլի 11-13-ին: Այդ մասին NEWS.am-ին հայտնել է Հայաստանի ԱԳՆ մամուլի քարտուղար Տիգրան Բալայանը' հերքելով ադրբեջանական Vesti.az կայքի պնդումները:
«Հայկական կողմը նման հրավեր չի ստացել»,- ընդգծել է Տիգրան Բալայանը' նշելով, որ այդ օրերին նախարարն այլ ժամանակացույց ունի:
Ապրիլի 11-ից 13-ը Մոսկվայի Միջազգային հարաբերությունների պետինստիտուտը' շրջանավարտների միության, Ադրբեջանում շրջանավարտների միության եւ ՄԳԻՄՕ-ի Զարգացման հիմնադրամի մասնակցությամբ կազմակերպելու է «Միասին դեպի ապագա» 1-ին միջազգային համաժողովը:
Ավելի վաղ ադրբեջանական լրատվամիջոցները հայտնել էին նաեւ ՌԴ ԱԳ նախարար Սերգեյ Լավրովի մասնակցության մասին, սակայն ՌԴ ԱԳՆ-ն եւս հերքել էր տեղեկությունները:
