Ռուսաստանում արդեն ոչինչ չի մնացել, որի նկատմամբ պատժամիջոցներ կարելի է կիրառել, հայտարարել է Սպիտակ տան անվտանգության հարցերով խորհրդատու Ռոբերտ Օ’Բրայենը, հաղորդում է ՌԻԱ Նովոստի-ն:
«Ռուսների հետ խնդիրն այն է, որ այդտեղ չկա գրեթե ոչինչ պատժամիջոցների ենթարկելու համար»,-ասել է նա:
Ավելի վաղ Վլադիմիր Պուտինը նշել է, որ ԱՄՆ դիրքորոշումը կայանում է Ռուսաստանի զարգացումը զսպելու մեջ, կրում համակարգային բնույթ եւ սահմանափակում է Մոսկվայի հետ Դոնալդ Թրամփի համագործակցությունը:
Ինչպես հիշեցրել է Ռուսաստանի առաջնորդը, Թրամփի նախագահության օրոք Ռուսաստանի դեմ սահմանվել են ամենամեծ թվով սահմանափակումներն ու պատժամիջոցները: «46 անգամ որոշումներ են կայացվել նոր պատժամիջոցների կամ արդեն գործողների ազդեցությունն ընդլայնելու վերաբերյալ»:
Այսպես, սեպտեմբերի 24-ին մի խումբ ամերիկացի սենատորներ ներկայացրել էին Ալեքսեյ Նավալնիի միջադեպի պատճառով հակառուսական պատժամիջոցների մասին օրինագիծ: Այն ենթադրում էր սահմանափակումներ ընդդեմ պաշտոնական անձանց, որոնք, փաստաթղթի հեղինակի կարծիքով, ներգրավված են միջազգային իրավունքի բացահայտ խախտման մեջ, այդ թվում՝ կոռուպցիայի դեմ պայքարի հիմնադրամը ստեղծողին թունավորողի մեջ:
Դրա նախորդ օրը Միացյալ Նահանգները պատժամիջոցներ էին սահմանել Ռուսաստանի ութ քաղաքացիների, ինչպես նաեւ երեք երկրներից յոթ ընկերությունների դեմ: ԱՄՆ ֆինանսների նախարարությունը հայտարարել էր, որ սահմանափակումներն ուղղված են ընդդեմ Կրեմլի հետ կապ ունեցող ռուս գործիչ Եվգենի Պրիգոժինի ցանցի, մասնավորապես, ընդդեմ ընկերությունների եւ ֆիզիկական անձանց, որոնք զբաղվել են Կենտրոնաֆրիկյան Հանրապետությունում Ռուսաստանի ազդեցության ընդլայնմամբ:
