Չնայած Հայաստանի նոր իշխանություններն ընդդիմադիր հռետորաբանության տարիներին միշտ քննադատում էին խնամի-ծանոթ-բարեկամներին աշխատանքի տեղավորելու փաստը, սակայն նոր Հայաստանում նման երևույթներն առկա են ու դեռ շարունակվում են: Անգամ վարչապետ Նիկոլ Փաշինյանը բարեկամներին աշխատանքի տեղավորելու առիթով ասել էր. «Կա «Քաղաքացիական ծառայության մասին» օրենք, և մենք ամեն ինչ անելու ենք, որ ամեն մի իշխանություն չգա ու իր բաջանաղին չմտցնի պետական կառավարման համակարգ: Հիմա հարց. այս խոստումը կատարվե՞լ է. այո՛, լիարժեք, 100 տոկոսով կատարվել է»: Բայց, ինչպես շատ այլ հարցերում, այս հարցում էլ Նիկոլ Փաշինյանի հայտարարությունն ու հայկական իրականությունը էականորեն տարբեր են:

Արարատի նախկին մարզպետ Գարիկ Սարգսյանը յուր բարեկամներին աշխատանքի տեղավորելու հարցում արդեն իսկ խփել է բոլոր հնարավոր և անհնար ռեկորդները: Գարիկ Սարգսյանը Արարատի մարզպետարանում աշխատանքի է ընդունել իր զարմիկին՝ Գևորգ Մանուկյանին, ում նշանակել է իր օգնականի պաշտոնում:

Համընդհանուր խրախճանքից հետ չի մնացել նաև նախկին սոցապ նախարար Զարուհի Բաթոյանը: Մասնավորապես, նախարարը աշխատանքից ազատել էր նախարարության աշխատակազմի ղեկավար Արտակ Գրիգորյանին, ու այդ պարտականություններն այժմ իր աշխատանքին զուգահեռ կատարում է նախարարության ֆինանսատնտեսագիտական և հաշվապահական հաշվառման վարչության պետ Ստեփան Մաչյանը: Եվ այստեղ ուշագրավն այն է, որ Մաչյանը Բաթոյանի քրոջ ամուսնու եղբայրն է՝ տեգրը:

Կրթության, գիտության, մշակույթի և սպորտի նախկին նախարար Արայիկ Հարությունյանի եղբայրը՝ Արման Հարությունյանը, Երևանի ավագանու «Իմ քայլ» խմբակցության անդամ է։ Իսկ իր կուրսընկերը՝ Արթուր Իսրայելյանը, նշանակվել է ԵՊՀ միջազգային համագործակցության և հասարակայնության կապերի գծով պրոռեկտոր։

Մամուլը բազմիցս է անրադարձել ՊԵԿ փոխնախագահ Ռաֆիկ Մաշադյանի բարեկամներին, ովքեր պարբերաբար յուղոտ պաշտոններ են ստանում: Մասնավորապես՝ վերջերս հրաման է ստորագրվել Ալբերտ Ալեքսանյանին ՊԵԿ կազմակերպման եւ հսկողության վարչության պետի տեղակալ նշանակելու մասին: Ալբերտ Ալեքսանյանը Ռաֆիկ Մաշադյանի եղբոր փեսան է: Մաշադյանի որդին էլ` 23-ամյա Հարություն Մաշադյանը, նշանակվել է Երևանի կայազորի զինվորական դատախազ:

Ընկերասիրությամբ հասցրել է աչքի ընկնել Փաշինյանի ևս մեկ կադր՝ առողջապահության նախարար Արսեն Թորոսյանը: Հոգեկան առողջության պահպանման կենտրոնի նախկին տնօրեն Նարեկ Վանեսյանը, հիշեցնենք, հայտնի սկանդալից հետո հրաժեշտ տվեց պաշտոնին, իսկ այդ պաշտոնին վերջինս նշանակվել էր միայն այն պատճառով, որ հանդիսանում էր նախարար Թորոսյանի մտերիմ ընկերը: Թորոսյանի հրամանով՝ Երեւանի «Սուրբ Գրիգոր Լուսավորիչ» բժշկական կենտրոնի տնօրեն էր նշանակվել Արման Հովակիմյանը, ով նույնպես նախարարի ընկերն է:  ՀՀ առողջապահության նախարարությունը Արուսիկ Մկրտչյանի՝ Dj Վակցինայի հիմնադրած «Ին Փրոգրեսս Փրոդքաշն» ընկերության հետ պայմանագիր էր կնքել եւ մոտ 20 հազար ԱՄՆ դոլար փոխանցել նրան, Մկրտչյանը նույնպես հանդիսանում է Թորոսյանի մտերիմը:

Սասուն Միքայելյանի որդին հեղափոխությունից հետո զբաղեցրեց Հրազդանի քաղաքապետի պաշտոնը, Միքայելյանի դուստրը՝ Սաթենիկ Միքայելյանը, նշանակվել է Կոտայքի մարզպետի օգնականի պաշտոնում:

ՀՀ վարչապետ Նիկոլ Փաշինյանի որոշմամբ՝ Սերգեյ Մեղրյանը նշանակվել է գլխավոր հարկադիր կատարող (ԴԱՀԿ պետ): Ըստ մամուլում առկա տեղեկությունների՝ վերջինս հանդիսանում է Արդարադատության նախարար Ռուստամ Բադասյանի ընկերը։ՊԵԿ նախագահ Էդվարդ Հովհաննիսյանը նույնպես հանդիսանում է Բադասյանի մտերիմը: ՀՀ արդարադատության նախարար Ռուստամ Բադասյանի կինն էլ՝ Տաթևիկ Սագսյանը, հանդիսացել է ՀՀ ԱԺ փոխնախագահ Լենա Նազարյանի գրանսենյակի աշխատակից՝ փորձագետի հաստիքով: Ներկայումս նա չի զբաղեցնում այդ պաշտոնը: Համաձայն համացանցում առկա տեղեկատվության՝ Ռուստամ Բադասյանը իր մանկության ընկեր Սուրեն Գալստյանին նշանակել է ԱՆ աշխատակազմի պետ, իսկ քավորին՝ Դավիթ Գասպարյանին, նշանակել է ԱՆ վերահսկողական ծառայության պետ:

Հայկ Մարությանը Երևանի քաղաքապետարանում շարունակում է դեռևս 2018-ից սկսված ԽԾԲ-ն։ Մարությանի ընկերներ Աշոտ Մելոյանն ու Հովհաննես Գրիգորյանը, որոնք Մարությանի հետ միասին նկարահանվում էին «Կարգին հաղորդման» մեջ, դեռևս նախորդ տարի աշխատանքի են անցել «Թափառող կենդանիների վնասազերծման կենտրոն» ՀՈԱԿ-ում։ Ի՞նչ կապ ունեն դերասաններն ընդհանրապես կենդանիների ստերջացման և խնամքի հետ, կարելի է միայն «պատկերացնել»։ Հիշեցնենք նաև, որ «Թափառող կենդանիների վնասազերծման կենտրոն» ՀՈԱԿ-ում քրեական գործ է հարուցվել յուրացման և վատնման հատկանիշներով։Համաձայն մամուլի հրապարակումների՝ քաղաքապետի խորհրդական Արթուր Սարգսյանի, «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանի և «Երևանի աղբահանություն և սանիտարական մաքրում» հիմնարկի տնօրենի ժ/պ Արմեն Գրիգորյանի նշանակման հարցերում կրկին դեր է խաղացել Մարությանի կինը, ով մտերիմ է նշանակված անձանց կանանց հետ և ընդհանուր զրույցներում միջնորդել է հենց նրանց նշանակել այդ պաշտոններին:

Նիկոլ Փաշինյանի մանկության ընկեր Վահե Ղազարյանը նշանակվել է Ոստիկանության պետ։ Հայկ Ղալումյանը՝ Փաշինյանի մանկության ընկերը և կնքահայրը, նշանակվել է Իջևան համայնքի ղեկավարի պաշտոնակատար։ Հայկ Ղալումյանի եղբայր Վահե Ղալումյանն էլ դարձել է պատգամավոր։ Փաշինյանի դասընկերուհի Մանե Ղազումյանը նշանակվել է Տավուշի մարզի կրթության-մշակույթի-սպորտի վարչության պետի ժամանակավոր պաշտոնակատար։ Փաշինյանի ընկեր Զարեհ Սարգսյանի որդի Հայկ Սարգսյանը դարձել է պատգամավոր, իսկ Նաիրի Սարգսյանը Փաշինյանի օգնականն է։

Ազգային անվտանգության ծառայության քննչական դեպարտամենտի պետի պաշտոնին նշանակվել է Արթուր Պողոսյանը, ով հանդիսանում է ԱԱԾ նախկին պետ Արգիշտի Քյարամյանի ընկերը: Քյարամյանի սանիկ Արթուր Նահապետյանը, ով Շիրակում դատախազի տեղակալ է եղել, ՊՎԾ-ում պաշտոնի է նշանակել: Նախկինում ԱԱԾ պետերը աչքի չեն ընկել իրենց մերձավորներին գերատեսչությունում աշխատանքի տեղավորելով: 

 ՏՄՊՊՀ նախագահ էր նշանակվել Գեղամ Գևորգյանը, ով հանդիսանում է Տիգրան Ավինյանի մտերիմը: Փոխվարչապետ Տիգրան Ավինյանի ընկերները և նրանց ընկերներն ու բարեկամները 2020 թ.-ից աշխատանքի են անցել «Ճանապարհային դեպարտամենտ» ՊՈԱԿ-ում։ Ավինյանի ընկերը նաև աշխատանքի և սոցիալական հարցերի նախկին նախարար Զարուհի Բաթոյանի քրոջ՝ Սյուզաննա Բաթոյանի տեգրն է։