Կոտայքի մարզի Զովունի գյուղի շենքերից մեկում այսօր 2 դի է հայտնաբերվել։ Տեղեկությունը հայտնում է ՀՀ քննչական կոմիտեի մամուլի ծառայությունը։

Ըստ հաղորդագրության` 2021թ. հոկտեմբերի 19-ին՝ ժամը 01։00-ի սահմանում, իրավապահներն ահազանգ են ստացել, որ բնակարաններից մեկում ապրող ամուսինները չեն արձագանքում հեռախոսազանգերին և դռան թակոցներին։

Ահազանգի հիման վրա դեպքի վայր է մեկնել քննչական-օպերատիվ խումբը և հիշյալ բնակարանի ննջասենյակում՝ մահճակալի վրա, հայտնաբերել 1949թ․ և 1954թ․ ծնված ամուսինների դիերը, իսկ մահճակալի կողային հատվածներում՝ ապակյա բաժակներ, որոնց մեջ եղել են սպիտակավուն հեղուկի զանգվածներ: Բնակարանի հյուրասենյակում հայտնաբերվել է նաև գրություն։

Բացատրություններ են վերցվել հարևանությամբ բնակվող մի շարք անձանցից։

Նշանակել են դատաքիմիական և դիակի դատաբժշկական փորձաքննություններ։

Ամուսինների մահվան իրական հանգամանքները, ինչպես նաև մի շարք այլ հարցեր պարզաբանելու նպատակով հանձնարարություն է տրվել ՀՀ ոստիկանության Նաիրիի բաժնին։